Футбол: даври чоруми Чемпионати мамлакат байни дастаҳои Лигаи олӣ ҷамъбаст гардид

ДУШАНБЕ, 29.04.2019. /АМИТ «Ховар»/. Бозиҳои даври чоруми Чемпионати мамлакат байни дастаҳои Лигаи олӣ рӯзҳои истироҳат бо баргузории вохӯрӣ байни  дастаҳои «Кӯктош» ва «Панҷшер» дар ноҳияи Рӯдакӣ ва КМВА “Помир” бо “Хатлон” дар варзишгоҳи Вазорати мудофиа ба анҷом расиданд. Аловиддин Бӯриев шарҳ медиҳад.

Даври чоруми  Чемпионати мамлакат ба ғайр аз бозии байни дастаҳои КМВА “Помир” ва “Хатлон” бо бартарии соҳибони майдон гузашт ва дар он мизбонон ғолиб омаданд. Дар бозии марказӣ, дар варзишгоҳи “20-солагии Истиқлолияти Тоҷикистон”-и шаҳри Хуҷанд КФ “Хуҷанд” “Регар-ТадАз”-ро қабул карда, бо натиҷаи 3:1 пирӯз шуд. Соҳибони майдон дар нимаи аввали бозӣ ба дарвозаи “Реар-ТадАЗ” се тӯб заданд, ки он ғалабаовар гардид. Турсуналӣ Рустамов (1:0, дақ. 2), Даврон Эргашев (2:0, 7) ва Дилшод Бозоров (3:0, 39)  аз дастаи “Хуҷанд”ва Нозим Бобоҷонов (3:1, 60)  аз “Регар –ТадАЗ” тӯбҳоро ба нишон расониданд.

Чемпиони Тоҷикистон – “Истиқлол”-и Душанбе дастаи нави Лигаи олӣ- “Истаравшан”-ро дар Варзишгоҳи марказии ҷумҳуриявии шаҳри Душанбе бо ҳисоби калони 4:0 шикаст дод. Дар ин вохӯрӣ тӯби аз ҳама тезтарини мавсими нави футбол ба тӯри дарвозаи меҳмонон дар дақиқаи 1-ум аз ҷониби Муҳаммадҷон Раҳимов зада шуд. Эҳсони Панҷшанбе (2:0, 57) , Алишер Ҷалилов (3:0, 67) ва Шаҳром Самиев ( 4:0,72) дар тӯбзанӣ аз худ нақши босазо гузоштанд.

Барандаи медалҳои биринҷии мавсими гузашта –“Кӯктош”-и ноҳияи Рӯдакӣ дар майдонаш “Панҷшер”-ро қабул карда, бо нишондоди 3:1 дастболо гардид. Голҳоро Мӯҳсин Абдуғаффаров (1:0, 8 дақ.), Холмурод Назаров (2:0, 17), Маҳмадраҷаб Ҷобиров (2:1, 40) ва Мӯҳсин Абдуғаффоров (3:1, 83-аз пеналтӣ) ба ҳадаф расониданд. Баъди ин ғалаба “Кӯктош” ба зинаи сеюми ҷадвали мусобиқа баромад.

Дар вохӯрии охири даври чорум КМВА “Помир”, ки то ба ҳанӯз дар мавсими имсола ба ғалаба комёб нашудааст, натавонист дар бозии хонагиаш бар “Хатлон” пирӯз шавад. Дар натиҷа ҳисоб кушода нашуд ва дастаҳо ба якимтиёзӣ  карданд.

Дар даври чоруми Чемпионати мамлакат аз ҳама мухлиси зиёд дар бозии байни дастаҳои “Кӯктош” ва “Панҷшер” ҳузур доштанд , ки шумораашон ба 6 000 баробар шуд. Бозии байни дастаҳои “Хуҷанд” ва “Регар-ТадАЗ” 4 500 тамошобинро ба варзишгоҳ овард. Дар маҷмӯъ бозиҳои даври чорумро 11 450 тамошобин дар варзишгоҳҳо тамошо карданд, ки ин натиҷаи аз ҳама камтарин аз оғози Чемпионат мебошад.

Дар ин давр дарвозабонҳо аз дарвозаашон 12 тӯб гирифтанд, ки 10- тои онро соҳибони майдон ба нишон расониданд.

Доварон ба футболбозон 18-корти зард ва 2 корти сурх нишон доданд, ки ин маротиба аввал аст. Якбора ду бозингари “Регар-ТадАЗ”- Сафаралӣ Каримов (19-ум дақиқа, корти дуюми зард) ва Далер Шомуродов (33-юм дақиқа, барои ба ҳариф бо пой зарба задан) аз майдон ронда шуданд.

Чемпионати Тоҷикистон  Даври  4

«Хуҷанд» – «Регар-ТадАЗ» – 3:1

Голҳо: Турсуналӣ Рустамов, 2 (1:0). Давронҷон Эргашев, 7 (2:0). Дилшод Бозоров, 39 (3:0). Нозим Бобоҷонов, 60 (3:1).

Огоҳӣ: Давид Купатадзе, Торнике Ҷимшелеишвили, Фирдавс Чақалов («Хуҷанд»), Саидамири Саидаҳмад («Регар-ТадАЗ»).

Ронда шуданд: Сафаралӣ Каримов («Регар-ТадАЗ»), 19 – корти заоди 2-юм., Далер Шомуродов («Регар-ТадАЗ»), 33 – барои ба ҳариф бо пой зарба задан.

Бозингари беҳтарин: Даврондҷон Эргашев («Хуҷанд»).

Довар дар майдон : Сайёдҷон Зайниддинов (Душанбе).

25 апрел. Хуҷанд. Варзишгоҳи «20-солагии Истиқлолияти Тоҷикистон». 4500 тамошобин.

«Истиқлол» – «Истаравшан» – 4:0

Голҳо: Муҳаммадҷон  Раҳимов, 1 (1:0). Эҳсони Панҷшанбе, 57 (2:0). Алишер Ҷалилов, 67 (3:0). Шаҳром Самиев, 72 (4:0).

Огоҳӣ: Шериддин Бобоев, Ҷалил Кимсанов («Истиқлол»), Бахтовар Зокиров, Тулқинҷон Умаров, Абдураҳмон Қурбонов («Истаравшан»).

Бозингари беҳтарин: Фатхулло Фатхуллоев («Истиклол»).

Довар дар майдон: Бехруз Муртазоев  (Душанбе).

26 апрел. Душанбе. Варзишгоҳи марказии ҷумҳуриявии ш. Душанбе. 450 тамошобин

«Кӯктош» – «Панҷшер» – 3:1

Голҳо Муҳсин Абдуғаффоров, 8 (1:0). Холмурод Назаров, 17 (2:0). Махмадраҷаб Ҷобиров, 40 (2:1). Муҳсин Абдуғаффоров, 83 – аз пеналтӣ (3:1).

Огоҳӣ: Мунир Давлатбеков («Кғктош»), Шероз Абдуллоев, Шавкат Худойназаров, Марифҷон Марифбоев, Саидҷон Шарифов («Панҷшер»).

Бозингари беҳтарин: Мӯҳсин Абдуғаффоров («Кӯктош»).

Довар дар майдон: Сайвалӣ Турдиев (Вахш).

27 апреля. Рӯдакӣ. Варзишгоҳи  «Нефтяник». 6000 тамошобин.

КМВА «Помир» – «Хатлон» – 0:0

Огоҳӣ: Идибек Ҳабибуллоев, Шамсиддин Қосимов (КМВА «Помир»), Махмадалӣ Содиқов («Хатлон»).

Бозингари беҳтарин: Равшан Азизов («Хатлон»).

Довар дар майдон: Хусрави Сиддикзод (Душанбе).

27 апрел. Душанбе. Варзишгоҳи КМВА –и Вазорати мудофоиа. 500 тамошобин

Нишонзанҳои беҳтарин: Фатҳулло Фатҳуллоев («Истиқлол»), Бахтовар Зокиров («Истаравшан»), Нозим Бободжонов («Регар-ТадАЗ») – 3 тӯбӣ.

Даври 5-ум:

4 май

Оғоз, соати  17:00

«Панҷшер» – «Истиқлол»

«Хуҷанд» – «Кӯктош»

«Хатлон» – «Регар-ТадАЗ»

«Истаравшан» – КМВА «Помир»