ФУТБОЛ: Дастаи мунтахаби наврасони Тоҷикистон дар шаҳри Санкт-Петербург бо Полша бозӣ мекунад

ДУШАНБЕ, 28.05.2019. /АМИТ «Ховар»/. Дастаи мунтахаби наврасони то  17 солаи Тоҷикистон  оид ба футбол дар доираи омодагӣ ба Чемпионати ҷаҳон-2019  бо роҳбарии сармураббӣ Зайниддин Раҳимов дар 31 — умин  мусобиқаи байналмилалӣ, ки  ба хотираи аввалин ноиби президенти FIFA Валентин Гранаткин аз  4 то 14 июни соли равон  дар шаҳри Санкт-Петербурги Федератсияи Россия доир мегардад, иштирок мекунад.

Дар ин бора  аз Федератсияи футболи  Тоҷикистон ба мухбири АМИТ «Ховар» Меҳрони Қурбон хабар доданд.

Дар мусобиқаи мазкур иштироки 12 дастаи мунтахаби варзишгарони соли таваллуди 2001 дар назар аст.

Дастаи мунтахаби наврасони Тоҷикистон дар гурӯҳи «С» бо дастаҳои мунтахаби наврасони  Полша, Қирғизистон ва Россия-2 бозӣ мекунад.

Дастаи мунтахаби  наврасони Тоҷикистон  аввалин бозиашро 5 июн муқобили дастаи мунтахаби наврасони  Қирғизистон анҷом медиҳад. Шогирдони Зайниддин Раҳимов 7 июн дар даври дуюм бо дастаи мунтахаби  наврасони  Россия-2 ва 10 июн бо дастаи мунтахаби наврасони Полша  рақобат мекунанд.

Бояд гуфт, ки зери парчами дастаи дуюми Россия тими Санкт-Петербург баромад мекунад. Дастаи мазкур соли гузашта ғолиби ин мусобиқа гардида буд.
Хотирасон менамоем, ки  гурӯҳи «А» аз дастаҳои мунтахаби наврасони  Булғория, Молдова, Россия, Ҳиндустон ва гурӯҳи «В» аз дастаҳои  мунтахаби наврасони  Туркия, Эрон, Аргентина ва Юнон таркиб ёфтаанд.

Дар асоси низомномаи мусобиқа ғолибони гурӯҳҳо ва як дастаи беҳтарини  ҷои дуюми гурӯҳҳо ба нимфинал роҳ меёбанд. Дастаҳои дигар  бошад, барои ҷойҳои аз 5 то 12-ум мусобиқаро идома медиҳанд.

Лозим ба ёдоварист, ки  дастаи мунтахаби наврасони   Тоҷикистон таҳти роҳбарии Зайниддин Раҳимов дар  Чемпионати Осиё, ки  7 –уми октябри соли 2018  дар Малайзия баргузор гардида буд, медалҳои нуқраи мусобиқотро соҳиб шуда буданд.

Тазаккур бояд дод, ки   футболбозони навраси Тоҷикистон дар вохӯрии финалӣ, дар бозии баробар бо дастаи мунтахаби наврасони  Япония бо ҳисоби 1:0 мағлуб гардида, зинаи дуюми ифтихориро сазовор гардиданд.

Дастаи мунтахаби наврасони  Тоҷикистон миёни 45 дастаи қораи Осиё бори аввал дар таърихи футболи мамлакат ва Осиё тавонистанд, ки ба вохӯрии финалӣ роҳхат гирифта, саҳфаи корномаи варзишии  ҷумҳуриро рангин намоянд. Ба замми ин, баъди ин муваффақият маротибаи дуввум футболбозони мамлакат дар Чемпионати ҷаҳон, ки имсол дар Бразилия доир мегардад, иштирок менамоянд.