«Локомотив — Помир» дар Лигаи якуми Чемпионати Тоҷикистон оид ба футбол дар ҷои аввал аст

ДУШАНБЕ, 14.05.2019. /АМИТ «Ховар»/. «Локомотив — Помир» дар Лигаи якуми Чемпионати Тоҷикистон дар ҷои аввал аст. Ин ҳафта дар даври сеюми мусобиқа шогирдони Зайниддин Раҳимов бар «Барқчӣ» –и Ҳисор, ки соли гузашта дар Лигаи олии Чемпионати мамлакат ҳунарнамоӣ мекард, бо натиҷаи 4:1 ғалаба карданд.

Дар вохӯрӣ бо дастаи «Барқчӣ» дарвозабони «Локомотив-Помир»  дар дақиқаи 12-ум баъди зарбаи Умедҷон Рамазонов тӯбро аз дарвозааш гирифт. Баъдан даста бо голҳои Азизбек Ҳасанов (1:1, 21), Ҷонибек Шарифов (2:1, 52),  Рустам Соиров (3:1, 60) ва Парвиз Ҳоҷиев (4:1, 86) бартариро соҳиб шуда,  боз соҳиби се имтиёз гардид ва дар маҷмӯъ бо 9 имтиёз пешсаф аст.

Имсол ҳунарнамоии дастаи «Равшан»-и Кӯлоб низ чашмрас аст. Ин даста дар даври сеюм бо «Душанбе-83» мусовӣ (1:1) бозида, бо 7 имтиёз якҷоя бо дастаи «Файзканд»-и Восеъ зинаҳои дуюм ва сеюмро ишғол мекунанд.

Даври чоруми мусобиқа 16 ва 17 май сурат мегирад.  «Ваҳдат» бо «Исфара», «Шоҳмансур» бо «Дӯстӣ»,  «Файзканд» бо «Равшан», «Ҳулбук» бо « Эсхата»,  «Барқчӣ» бо «Зарафшон», «Душанбе-83» бо «Локомотив-Помир» ва «Парвоз» бо «Саройкамар»  қувва месанҷанд.

Нишонзанҳои беҳтарин: Далер Чолов («Равшан») – 5, Азизбек Ҳасанов («Локомотив-Помир»),  Насим Маҳмадқулов («Ҳулбук») – 4 тӯбӣ.