Паҳлавонони шинохтаи тоҷик дар мусобиқаи Ҷоми Аврупо дар Оренбург иштирок мекунанд

ДУШАНБЕ, 17.05.2019. /АМИТ «Ховар»/. 18-19  май дар шаҳри Оренбурги Россия Мусобиқаи байналмилалӣ оид ба дзюдо барои Ҷоми Аврупо миёни бузургсолон баргузор мегардад. Дар он даҳ паҳлавони шинохтаи  тоҷик   ширкат меварзанд. Дар ин бора корманди Кумитаи миллии олимпии Тоҷикистон Умаралӣ Сафаралӣ   ба АМИТ «Ховар»  хабар дод.

Тибқи иттилои манбаъ, дар Ҷоми Аврупо дар Оренбург ширкати беш аз 300 варзишгар (мардону занон) аз 24 давлат дар назар аст.

Бояд зикр кард, ки ба ҳайати дастаи мунтахаби Тоҷикистон  даҳ варзишгари шинохта дохиланд, ки дар сабқати мардон иштирок мекунанд.

Дар мусобиқаи мазкур Давлаталӣ Назаралиев (60 кг), Садр Боев, Хушвахт Идиев, Кароматулло Ҳакимов, Ҳақназар Назаров (ҳар чор дар вазни 81кг), Муҳаммад Муродов, Исроил Раҳимов, Муҳаммадуллоҳ Лоиқов, Аъзамшоҳ Расулов (ҳар чор дар вазни 90 кг) ва Шакармамад Мирмамадов (беш аз 100 кг) барои ба даст овардани медалҳо  ҳунарнамоӣ хоҳанд   кард.