«ШАБЕ ДАР ОСОРХОНА». Дар Осорхонаи миллии Тоҷикистон маҳфили фарҳангӣ ва илмӣ баргузор мешавад
ДУШАНБЕ, 14.05.2019 /АМИТ «Ховар»/. Ҳамасола 18 май бахшида ба Рӯзи байналмилалии осорхонаҳо Муассисаи давлатии «Осорхонаи миллии Тоҷикистон»-и назди Дастгоҳи иҷроияи Президенти Ҷумҳурии Тоҷикистон барномаи байналмилалии «Шабе дар Осорхона» баргузор менамояд.
Тавре сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷаев ба мухбири АМИТ «Ховар» хабар дод, имсол барномаи байналмилалии «Шабе дар Осорхона» таҳти унвони «Осорхонаҳо ҳамчун марказҳои фарҳангӣ: ояндаи анъанаҳо» баргузор мегардад.
Бино ба иттилои манбаъ, баҳри фароғати фарҳангии тамошобинон Осорхонаи миллии Тоҷикистон 18 маҳфили фарҳангӣ ва илмӣ омода намудааст, ки онҳо шаби 18 май манзури тамошобинон гардонида мешаванд. Ин маҳфилҳо ба мардум шароити мусоид фароҳам меоваранд, то фурсате бо аҳли оилаи худ ба сайру гашт бипардозанд.
Тавре Ф.Кенҷаев зикр намуд, ифтитоҳи расмии барномаи «Шабе дар Осорхона» 18 май, соати 17:40 дар саҳни даромадгоҳи Осорхона бо иштироки карнайнавозон ва ҳунармандони Сирки давлатии Тоҷикистон дар назар аст. Инчунин навозиши созҳои мусиқӣ аз ҷониби мутрибон, қироати шеърҳо аз ҷониби тамошобинон ва ташкили саҳнаҳои театрикунонидашуда манзури бинандагон мегардад.
Ҳамчунин иштирокчиёнро маҳфили «Як тасвир», «Хушнавис», «Мутриб», «Оҳанги муассир», «Ҳозирҷавоб», интелект-шоу барои кӯдакон, қироати шеърҳо, чистонгӯӣ, намоиши филмҳои «Тоҷикистон- кишвари сайёҳӣ», ихтироъкорони ҷавон, намоиши кашфиёти техникӣ ва озмуни акси беҳтарин «Ман ва Осорхона» интизоранд.
Бояд зикр намуд, ки соли 2006 зиёда аз 2000 осорхона аз 38 кишвари дунё ва соли 2015 бештар аз 35 ҳазор осорхона аз 145 мамолики дунё иштирочиёни чорабинии байналмилалии «Шабе дар Осорхона» гардида буданд. Айни замон ҳазорҳо осорхонаи беш аз 150 кишвари ҷаҳон иқдоми байналмилалии «Шабе дар Осорхона»-ро баргузор менамоянд. Осорхонаи миллии Тоҷикистон низ аз соли 2013 инҷониб иқдомоти байналмилалии мазкурро ҳамасола баргузор менамояд.
Мақсади асосии иқдоми мазкур ҷалби ҳарчи бештари тамошобинон, алоқамандони нав, махсусан ҷавонон барои шинохти мероси таърихию фарҳангӣ мебошад.
Сокинону меҳмонони шаҳри Душанбе, аз қабили калонсолону ҷавонон, занону мардон ва наврасону кӯдакон имкон доранд дар ин чорабинии байналмилалӣ ширкат варзида, аз тамошои он лаззат мебаранд.
Дар Душанбе дуюмин Синамоҷашнвораи байналмилалӣ «Тоҷи сомон» баргузор мегардад
Дар театри Муҳаммадҷон Қосимов намоишномаи «Ман Таҳминаам…» аз рӯи достони «Шоҳнома» пешниҳод мегардад
Бо ташаббуси Агентии ҳифзи мероси таърихию фарҳангӣ дар ноҳияи Ховалинг Рӯзи Ваҳдати миллӣ ҷашн гирифта шуд
Шоири халқии Тоҷикистон Камол Насрулло: «Ҳақиқат ин аст, ки Пешвои миллат ваҳдатро бунёд гузошту таҳким доду қавӣ сохт»
Дар Осорхонаи миллӣ гӯшаи доимоамалкунандаи «Ваҳдати миллӣ» ташкил гардидааст
Тамоми комёбиҳои миллат ва саодати рӯзгори мардум аз иттиҳоди миллӣ ибтидо мегирад
«ЭМОМАЛӢ РАҲМОН – МЕЪМОРИ СУЛҲУ ВАҲДАТ». Дар Вазорати фарҳанг ҳамоиши илмӣ доир гардид
Таҳти унвони «Қисса ва ҳикояҳо» китоби Абдурофеъ Рабизода нашр гардид
«ДАР МЕҲМОНИИ ДУШАНБЕ». Фестивали байналмилалии эҷодиёти бадеии кӯдакон ва наврасони ИДМ оғоз гардид
Дар Агентии ҳифзи мероси таърихию фарҳангӣ таҳти унвони «Ваҳдати миллат — бақои миллат!» ҳамоиш баргузор шуд
Дар ёдгории Ҳалқаҷари ноҳияи Хуросон бозёфти нодири таърихӣ — «обкӯзаи хонуми Сагкин» кашф гардид
«Душанбе — нусхае аз биҳишт». Таҳти ин унвон дар васфи пойтахти Тоҷикистон китоб ба нашр расид
