Сабрина Абророва дар Чемпионати Осиё оид ба шоҳмот дар Тошканд иштирок менамояд

ДУШАНБЕ, 18.06.2019. /АМИТ «Ховар»/. Аз 19 то 29 июни соли равон дар шаҳри Тошканди Ҷумҳурии Ӯзбекистон 15-умин Чемпионати Осиё оид ба шоҳмот миёни мактаббачаҳо доир мегардад, ки дар он яке аз  шоҳмотбозони шинохтаи тоҷик Сабрина Абророва  ширкат меварзад.

Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба мухбири АМИТ «Ховар» Меҳрони  Қурбон хабар  дод.

Тибқи иттилои манбаъ, мусобиқаҳои мазкур  дар 6 категория – то 7, 9, 11, 13, 15 ва то 17-сола миёни духтарон ва писарон аз рӯи шоҳмоти классикӣ, рапид ва блитс сурат мегирад.

Дар чемпионати мазкур аз Ҷумҳурии Тоҷикистон 8 нафар, аз ҷумла шоҳмотбози шинохта  Сабрина Абророва, ки чанде пеш дар Бозиҳои ҷаҳонии наврасон дар Ханти Мансийски Федератсияи  Россия ғолиб гардида буд, миёни то 13-солаҳо, инчунин Назар Ғафуров (то 7-солаҳо), Пайрав Қодирӣ (то 9-солаҳо), Ҷалолиддин Илҳомӣ (то 13-солаҳо), Рухшона Саидова, Меҳриддин Шарифов (то 15-солаҳо), Марям Илҳомзода ва Меҳрбахш Қандаков (то 17-солаҳо) иштирок мекунанд.