Доварони тоҷик ба бозиҳои Ҷоми ҷаҳон-2022 даъват шуданд

ДУШАНБЕ, 21.08.2019 /АМИТ «Ховар»/. Доварони ФИФА аз Ҷумҳурии  Тоҷикистон— Насрулло Кабирови 34-сола ва Гулмуроди Саъдуллои 28-сола ба бозиҳои даври дуюми марҳилаи интихобии Чемпионати ҷаҳон-2022 даъват шудаанд. Дар ин бора ба   АМИТ «Ховар» аз Федератсияи футболи Тоҷикистон хабар доданд.  

Тибқи иттилои манбаъ, Насрулло Кабиров дар бозии якуми марҳилаи гурӯҳии даври интихобии Чемпионати ҷаҳон- 2022 дар гурӯҳи «С»  миёни дастаҳои мунтахаби Камбоҷа ва Гонконг ба ҳайси довари чорум таъйин шудааст. Бозии мазкур 5  сентябри соли равон  дар шаҳри Пном Пени Камбоҷа доир мешавад.

Гулмуроди Саъдулло ба вохӯрии дуюми даври интихобии Чемпионати ҷаҳон-2022 дар гурӯҳи «Е» байни дастаҳои миллии Афғонистон ва Бангладеш ҳамчун довари эҳтиётӣ даъват гардидааст. Баргузории ин вохӯрӣ 10  сентябр дар Варзишгоҳи марказии шаҳри Душанбе дар назар аст.