Имрӯз Мусобиқаи байналмилалӣ оид ба теннис барои дарёфти «Ҷоми Президенти Ҷумҳурии Тоҷикистон» оғоз мегардад

ДУШАНБЕ, 23.08.2019. /АМИТ «Ховар»/.  Имрӯз дар Қасри тенниси шаҳри Душанбе маросими кушодашавии 10-умин Мусобиқаи байналмилалӣ оид ба теннис байни наврасон барои дарёфти «Ҷоми Президенти Ҷумҳурии Тоҷикистон» оғоз меёбад.

Мусобиқаи  мазкур дар асоси тақвими нақшаи чорабиниҳои Кумитаи кор бо ҷавонон ва варзиши назди Ҳукумати ҷумҳурӣ дар ҳамкорӣ бо Федератсияи тенниси Тоҷикистон доир гардида, дар он варзишгарон аз Тоҷикистон, Ӯзбекистон, Қирғизистон, Туркманистон, Афғонистон, Покистон, Россия, Беларус, Америкаю Канада иштирок ва  барои дарёфти  «Ҷоми Президенти Ҷумҳурии Тоҷикистон» мубориза менамоянд.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» хабар доданд,  Мусобиқаи байналмилалӣ оид ба теннис соати 16:00 оғоз шуда,  дар  маросими ифтитоҳи он намояндагони вазорату идораҳо, сафирон ва меҳмонон  иштирок менамоянд.

Мақсад  аз баргузории мусобиқаи мазкур- рушди варзиш дар ҷумҳурӣ, тарғиби тарзи ҳаёти солим, муттаҳидӣ, ягонагӣ ва дӯстӣ миёни миллатҳою варзишгарон  мебошад.

Мусобиқаи  байналмилалӣ оид ба теннис  аз 23  то 27 август идома ёфта, барои   ғолибони ҷои аввал 10 ҳазор  сомонӣ, ҷои дуюм 8 ҳазор  сомонӣ ва ҷои сеюм 5 ҳазор сомонӣ мукофот пешбинӣ шудааст.

Ёдовар мешавем, ки  бо фармони Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмон  аз 19 марти соли 2005  инҷониб ҳамасола 23 — 27 август дар шаҳри Душанбе Мусобиқаи байналмилалӣ оид ба теннис байни наврасон барои дарёфти “Ҷоми Президенти Ҷумҳурии Тоҷикистон” гузаронида мешавад.