Тоҷикистонро дар «Текстиллегпром» панҷ корхонаи дӯзандагӣ ва нассоҷӣ муаррифӣ менамоянд

Сентябрь 17, 2019 10:00

ДУШАНБЕ, 17.09.2019/АМИТ «Ховар»/. Панҷ корхонаи нассоҷӣ ва дӯзандагӣ, назири «Ваҳдат», «Лиман», «Раҳимов А.А.», «Файзи истиқлол» ва «ХИМА-Текстил» Тоҷикистонро дар Намоишгоҳи  байналмилалии «Текстиллегпром», ки бузургтарин намоишгоҳи тахассусӣ дар миқёси Иттиҳоди  Давлатҳои Мустақил маҳсуб шуда,   имрӯз дар Москва оғоз ёфт, намояндагӣ мекунанд. Дастовардҳои навтарини Тоҷикистон дар истеҳсоли ришта, матои пахтагин ва либосворӣ дар намоишгоҳи «Текстиллегпром» то  20 сентябр ба намоиш гузошта мешаванд.

Иштироки корхонаҳои Тоҷикистон дар намоишгоҳи Москва дар доираи Барномаи ҷаҳонии нассоҷӣ ва дӯзандагӣ (GTEX)-и Маркази тиҷорати байналмилалӣ (МТБ) баргузор шуда, аз ҷониби Ҳукумати Швейтсария маблағгузорӣ мегардад. Дар намоишгоҳ ҳайати Тоҷикистонро масъулини ширкатҳои консалтингии «Business Consulting Group» /Хуҷанд/, «ACT Development Group» /Душанбе/ ва Иттифоқи рушди бахши хусусии Тоҷикистон раҳнамоӣ мекунанд. Дар ин бора ба АМИТ «Ховар» аз Маркази тиҷорати байналмилалӣ  иттилоъ доданд.

Бояд тазаккур дод, ки «Текстиллегпром», ки ҳамчун намоишгоҳи тиҷоратии федералии нассоҷӣ ва маҳсулоту таҷҳизоти саноати сабук шинохта мешавад, имконияти нодири намоиши маҳсулоти худ ва шиносоӣ бо тамоми бастаи маҳсулоти нассоҷӣ, шурӯъ аз ашёи хом ва таҷҳизот то ба маҳсулоти тайёр аст. Дар он харидорон ва коршиносони соҳа тақрибан аз  30 кишвари ҷаҳон иштирок доранд.

Сардори Департаменти нассоҷӣ ва дӯзандагӣ дар Иттифоқи рушди бахши хусусии Тоҷикистон Абдулло Муҳаммадиев мегӯяд:  «Россия  яке аз муҳимтарин ва ҷолибтарин бозор барои содироти маҳсулоти нассоҷиву дӯзандагии Тоҷикистон мебошад. «Текстиллегпром»  истеҳсолкунандагон ва харидоронро аз тамоми минтақаҳои Россия гирди ҳам меоварад ва имкони хуби шиносоӣ бо вазъи бозорҳоро медиҳад. Аз ин рӯ, ин намоишгоҳ барои корхонаҳои содиркунандаи Тоҷикистон имкони хубест, то бозори Россия ва талаботи онро бештар омӯзанд,  муаррифӣ созанд  ва бо шарикони эҳтимолӣ аз тамоми минтақаҳо робитаҳо барқарор намоянд».

Намоишгоҳи Москва имкони хубест, то ширкатҳои Тоҷикистон маҳсулоти худро дар саҳнаи байналмилалӣ намоиш бидиҳанд, бо харидорони эҳтимолӣ робитаи мустақим барқарор намоянд ва ҷуғрофиёи бозори худро тавсеа бахшанд. Корхонаҳои Тоҷикистон ҳам маҳсулоти хом, ба монанди ришта, матоъ, либосворӣ, матои пахтагин  ва ҳам маҳсулоти тайёр, ба монанди ҷӯроб, либоси мардона, занонаю кӯдакона, либоси махсус, трикотаж, ва либоси таҳпӯши мардонаву занона ба намоиш мегузоранд.

Ҳайати Тоҷикистон ҳамчунин бо ҳамкорони эҳтимолии тиҷоратӣ вохӯрда, бо фанновариҳои замонавию маҳсулоти навин шинос хоҳад шуд. Ҳайати Тоҷикистон имкон дорад дар конфронсҳои илмӣ, давраҳои омӯзишӣ ва суҳбатҳои “мизи гирд” иштирок намояд.

Сентябрь 17, 2019 10:00

Хабарҳои дигари ин бахш

РОҒУН — МИНТАҚАИ САЙЁҲӢ. Дар ин бора Қарори Ҳукумати Ҷумҳурии Тоҷикистон ба тасвиб расид
Ориф Амирзода: «Маҳз бар асари гармшавии иқлим беш аз 1000 пиряхи Тоҷикистон комилан об шудаанд»
БА ИСТИҚБОЛИ ҶАШНИ 35-СОЛАГИИ ИСТИҚЛОЛИЯТИ ДАВЛАТӢ. Дар ноҳияи Рашт 5 бунгоҳи тиббӣ мавриди истифода қарор гирифт
Имконияти сайёҳии Тоҷикистон дар ЭКСПО-и сайёҳии Ҷопон муаррифӣ мегардад
Ҷаласаи навбатии Шӯро оид ба муайян намудани сатҳи камбизоатӣ ва табақаи миёнаи аҳолӣ баргузор шуд
Дар Душанбе масъалаи ҳамкорӣ бо Маркази минтақавии рушди иқтидори Хазинаи Байналмилалии Асъор баррасӣ гардид
Дар ноҳияи Мурғоб иқтидори истеҳсоли энергияи офтобӣ зиёд мешавад
Дар Душанбе Созишнома оид ба маблағгузорӣ миёни Тоҷикистон ва Ассотсиатсияи Байналмилалии Рушд ба имзо расид
Раиси Шӯрои директорони ҶДММ «Ғаюр Гурӯҳ» Акбар Асадулло: «Имрӯз вақти дар амал собит кардани ватандӯстии мо расидааст»
Бартарафсозии оқибатҳои даргириҳои марзӣ дар деҳоти Чоркуҳ ва Сурхи Исфара таҳти таваҷҷуҳи хоссаи Пешвои миллат қарор дорад
ҲАМЛАИ ТАҶОВУЗКОРОНАИ ҚИРҒИЗИСТОН. Шералӣ Ризоён бар ин назар аст, ки фарзияи коршиноси қирғиз дар бораи лоиҳаи роҳи оҳани Чин-Қирғизистон-Узбекистон кирои танқид ҳам намекунад
Дар Душанбе ҷаласаи XXV Шӯрои байниҳукуматии ИДМ оид ба иктишоф, истифода ва ҳифзи қаъри замин оғоз ёфт