«Марказҳои букмекерӣ ва бозиҳои компютерӣ ҷойи донишҷӯён нест!»- бардошт аз мулоқот дар Донишгоҳи миллии Тоҷикистон

Октябрь 3, 2019 10:50

ДУШАНБЕ, 03.10.2019./АМИТ «Ховар»/. Намояндагони Хадамоти пешгирии ҳуқуквайронкунӣ байни ноболиғон ва ҷавонони Вазорати корҳои дохилии Ҷумҳурии Тоҷикистон  бо донишҷӯёни  факултети физикаи Донишгоҳи миллии Тоҷикистон  мулоқот намуданд. Дар  мулоқот   доир ба мавзӯи   пешгирии ҷавонон аз  ҷинояткорӣ ва дигар амалҳои номатлуб   суҳбат доир гардид.

Тавре аз Вазорати корҳои дохилии Ҷумҳурии Тоҷикистон ба АМИТ «Ховар» хабар доданд,  дар ҷамъомад  сардори Хадамоти пешгирии ҳуқуқвайронкунӣ байни ноболиғон ва ҷавонон Абдусаттор Фаттозода зикр кард, ки  ҷавонон,  бахусус донишҷӯён неруи тавоно ва созандаи миллату давлат маҳсуб шуда, пешрафту шукуфоӣ ва ояндаи  мамлакат аз онҳо вобастагии амиқ дорад.

«Аз ин лиҳоз, ҳар кадоми шумо, донишҷӯёнро зарур аст, ки  вақти пурқимати  худро танҳо ба  омӯхтани илму дониш сарф намуда, ҳамчун мутахассиси баландихтисос ба камол расида, ба халқу Ватан хизмат намоед. Шумо набояд ба беҳудагардӣ,   шиносоӣ бо ашхоси тасодуфӣ ва ҷиноятпеша   роҳ диҳед. Мутаассифона, тавре аз мушоҳидаҳо  бармеояд, бархе аз  донишҷӯён ба ҷойи омӯзиш вақти худро дар марказҳои букмекерӣ ва бозиҳои компютерӣ мегузаронанд, ки ин оқибати хуб надорад. Марказҳои букмекерӣ ва бозиҳои компютерӣ ҷои доншҷӯён нест!»,- таъкид намуд А.Фаттозода.

Мавсуф  зарари  бозиҳои зикршударо   ба донишҷӯён фаҳмонида, ҳамчунин оид ба истифодаи дурусти симкортҳои мобилӣ  ёдовар гардид. Аз ҷумла, зикр кард,  ки  онҳо дар муносибат бо симкортҳои телефонҳои мобилӣ  эҳтиёткор  бошанд. Зеро нафарони ҷинояткор аз симкортҳое истифода менамоянд, ки ба ному насаби дигарон ба қайд гирифта шуда бошанд. Дар ин сурат тибқи тағйироти воридгардида ба қонунгузории  мамлакат  соҳиби аслии симкорт низ ба ҷавобгарӣ кашида мешавад.

Илова бар ин, дар мулоқот  ба донишҷӯён дар бораи Вируси норасоии масунияти бадан, ки  имрӯзҳо  ҷомеаи ҷаҳониро ба ташвиш овардааст, маълумот ва ҷиҳати  пешгирии  ин зуҳуроти номатлуб  ба онҳо дастурҳои зарурӣ дода  шуд.

Дар фарҷом аз донишҷӯён даъват ба амал оварда шуд, ки   дар мубориза ва муқовимат бар зидди  ҷинояту ҷинояткорӣ  онҳо  бо  мақомоти милитсия ҳамкорӣ намоянд. Таъкид гардид, ки  танҳо дар якҷоягӣ метавон  ҷинояткориро пешгирӣ карда, онро дар ҷомеа коҳиш дод.

Октябрь 3, 2019 10:50

Хабарҳои дигари ин бахш

16 СЕНТЯБР — РӮЗИ БАЙНАЛМИЛАЛИИ ҲИФЗИ ҚАБАТИ ОЗОН. Барои ҳифзи қабати он аз вайроншавӣ Конвенсияи Вена қабул карда шуд
Аз ифлосшавии ҳаво ва таъсири чангу ғубор худро эҳтиёт намоед!
Дар ноҳияи Ҷалолиддини Балхӣ деҳаи нав — «Обшорон» бунёд карда шуд
«БЕҲТАРИН ХИЗМАТЧИИ ДАВЛАТӢ АЗ ҲИСОБИ ЗАНОН». Дар Бадахшон даври вилояти озмуни ҷумҳуриявӣ доир гардид
Озмунҳои ҷумҳуриявӣ завқи кадбонугӣ ва анъанаҳои хӯрокпазии миллиро эҳё менамоянд
Саридораи бойгонӣ ҳамчун ниҳоди муҳими давлатӣ дар Тоҷикистон мавқеи назаррас дорад
Дар Душанбе масъалаҳои пешбурди ҳифзи ҳуқуқи инсон баррасӣ шуданд
Рушди соҳаи гастроэнтерология ва гепатология баррасӣ гардид
Намояндаи Суди конститутсионии Тоҷикистон дар Форуми байналмилалии адолати конститутсионӣ иштирок намуд
Дар Душанбе Маркази ҷумҳуриявии илмии онкологӣ навсозӣ карда мешавад
Судяҳои Тоҷикистон дар машварати омӯзишӣ дар Чин иштирок намуданд
Дар фасли тирамоҳ бемориҳои музмин бештар мегарданд