ДУШАНБЕ, 25.10.2019 / АМИТ «Ховар»/. Дар ҷаласаи рӯзи 25 октябр сарони ҳукуматҳои Иттиҳоди Давлатҳои Мустақил (ИДМ) ҳамкориро дар соҳаи рушди рақамии ҷомеа баррасӣ мекунанд, изҳор дошт муовини якуми раиси кумитаи Думаи давлатӣ оид ба корҳои ИДМ, интегратсияи Авруосиё ва робита бо ҳамватанон Константин Затулин. Ҷаласаи Шӯрои сарони ҳукуматҳои ИДМ дар Москва баргузор мегардад, хабар медиҳад АМИТ «Ховар» бо истинод ба хадамоти матбуоти Кумитаи иҷроияи ИДМ. 

«Дар ҷаласа як зумра қарорҳои рӯзномаи он баррасӣ карда мешаванд, агар хато накунам 13 масъала. Муҳимтарин масъалаҳое, ки бояд баррасӣ шаванд, Консепсияи ҳамкории кишварҳои узви ИДМ дар соҳаи рушди рақамии ҷомеа ва Нақшаи чорабиниҳои афзалиятнок доир ба татбиқи он, Стратегияи таъмини амнияти иттилоотии ИДМ ва дигар масъалаҳо мебошанд», — илова намуд Затулин .

ДАР АКС: парки техникии «Сколково» дар Москва, ки дар он ҷо 25 октябри соли 2019 ҷаласаи сарони ҳукуматҳои ИДМ баргузор мегардад.