РАСИДАГӢ БА МУРОҶИАТИ ШАҲРВАНДОН – ДАР МАДДИ АВВАЛ. Раиси шаҳри Ҳисор Шарифҷон Ҷумъазода бо иштироки ҳайати Равзанаи ягона Рӯзи қабули шаҳрвандон баргузор намуд

Ноябрь 30, 2019 12:37

ДУШАНБЕ, 30.11.2019/АМИТ «Ховар»/. Раиси шаҳри Ҳисор Шарифҷон Ҷумъазода бо иштироки ҳайати Равзанаи ягона дар ҷамоати деҳоти Хонақоҳи кӯҳӣ Рӯзи қабули шаҳрвандон баргузор намуд, иттилоъ медиҳад хабарнигори АМИТ «Ховар».

Мавриди зикр аст, ки 29 нафар шаҳрвандон ба шаҳрдори Ҳисор ҷиҳати ҳалли масъалаҳо оид ба ҷудо намудани қитъаи замини наздиҳавлигӣ, таъмиру тармими роҳҳо, баҳсҳои оилавӣ ва дигар масоили мавҷуда муроҷиат карданд.

Шарифҷон Ҷумъазода аз қабули шаҳрвандон натиҷагирӣ намуда, зикр дошт, ки дар Ҳисор, хусусан дар деҳот ҳанӯз  масъалаю  муаммоҳои ҳалталаб зиёданд ва фаъолияти мақомоти иҷроияи маҳаллии  ҳокимияти давлатӣ, худидоракунии маҳаллӣ ва ташкилоту муассисаҳои шаҳр дар самти кор бо муроҷиатҳои шаҳрвандон ба беҳбудӣ ниёз дорад.

Дар ин замина ба роҳбарияти шаҳр, раисони ҷамоатҳои шаҳраку деҳот ва роҳбарони ташкилоту муассисаҳо дастур дода шуд, ки ба баррасии муроҷиатҳои шаҳрвандон ва бартараф намудани муаммоҳои ҷойдошта эътибори ҷиддӣ зоҳир намоянд. «Расидагӣ ба муроҷиати шаҳрвандони бояд дар  авлавияти фаъолияти роҳбарони идораю муассисаҳои шаҳр  бошад», — гуфт Раиси  шаҳри Ҳисор ва  таъкид дошт, ки эътибор ба ҳалли масъалаҳои иҷтимоӣ дар меҳвари сиёсати мардумпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад.

Ба масъулин бобати ҳалли саривақтии муроҷиатҳо як моҳ муҳлат дода шуд.

Сипас раиси шаҳр Шарифҷон Ҷумъазода аз рафти бунёди иншооти ҷашнӣ, вазъи таълиму тарбия дар муассисаҳои таълимӣ, хизматрасонии тиббӣ, истифодаи оқилонаи замин, вазъи роҳҳо ва  омодагии хоҷагиҳо ба мавсими тирамоҳу зимистон дидан намуда, баъдан бо фаъолони ҷамоат мулоқот баргузор намуд ва  бори дигар вазъи фаъолият, иҷрои нақшаҳои соҳавӣ ва дурнамои ояндаи амалро мавриди таҳлилу баррасӣ қарор дод.
Баргузории Рӯзи қабули шаҳрвандон тариқи Равзанаи ягона аз ҷониби раиси шаҳри Ҳисор Шарифҷон Ҷумъазода дар ҷамоатҳои шаҳраку деҳот идома дорад.

Хотиррасон менамоем, ки қабули шаҳрвандон аз ҷониби роҳбарони мақомоти марказию маҳаллии ҳокимияти давлатӣ дар сароосари мамлакат тибқи дастури Сарвари давлат ва дар асоси Қонуни Ҷумҳурии Тоҷикистон «Дар бораи муроҷиати шахсони ҳуқуқӣ ва воқеӣ» ба роҳ монда шудааст.

Ноябрь 30, 2019 12:37

Хабарҳои дигари ин бахш

Ҳамкории Тоҷикистон бо Барномаи рушди СММ дар соҳаи ҷавонон ва варзиш тақвият меёбад
Дар Агентии суғуртаи иҷтимоӣ ва нафақа андозаҳои нави нафақаҳоро номбар намуданд
НИШАСТИ МАТБУОТӢ. Дар шашмоҳаи якуми соли 2025 беш аз 58 ҳазор шаҳрвандон ба нафақа баромадаанд
Вазири адлияи Тоҷикистон: «Бекоршавии ақди никоҳ тамоюли камшавӣ дорад»
НИШАСТИ МАТБУОТӢ. Дар шашмоҳаи якуми соли 2025 шумораи парвандаҳои судӣ коҳиш ёфтааст
НИШАСТИ МАТБУОТӢ. Ба 5803 нафар шаҳрванд машварати ҳуқуқӣ расонида шуд
Дар ноҳияи Файзобод иншооти соҳаи тандурустӣ бунёду навсозӣ карда мешаванд
Дар ноҳияи Шаҳристон доир ба Ваҳдати миллӣ чун рукни асосии ташаккули ҷомеа ва давлат вохӯрӣ баргузор шуд
Маҷлиси Кумитаи иҷроияи Ҳизби Халқии Демократии Тоҷикистон дар шаҳри Душанбе баргузор гардид
НИШАСТИ МАТБУОТӢ. Маркази тадқиқоти стратегӣ бо 26 маркази тадқиқотии хориҷӣ созишномаҳо ба имзо расонид
НИШАСТИ МАТБУОТӢ. Зиёда аз 57 миллион сомонӣ маблағ ба манфиати модару кӯдак ситонида шудааст
Дар Тоҷикистон содиршавии ҷиноят нисбат ба кӯдакон 30 фоиз зиёд шудааст