Соли 2020 дар шаҳраки Бӯстони ноҳияи Мастчоҳ майдони Парчам ба истифода дода мешавад

ДУШАНБЕ, 22.11.2019 /АМИТ «Ховар»/. Дар  арафаи таҷлили 23-солагии Рӯзи Ваҳдати миллии соли  2020 дар шаҳраки Бӯстони  ноҳияи Мастчоҳ майдони Парчами давлатӣ ба истифода дода мешавад. Сохтмони  сутун ва майдони Парчам соли равон бо дастгирии Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода оғоз шудааст. Дар ин бора Раиси ноҳияи Мастчоҳ Ғайрат Азиззода ба АМИТ «Ховар» иттлоъ дод.

Ба зикри номбурда, дар Ҷумҳурии Тоҷикистони соҳибистиқлол  давоми  даҳ сол 24 ноябр  ҳамчун Рӯзи Парчами давлатӣ бо шукӯҳу ҷалоли беназир таҷлил карда мешавад, ки   он нишони арҷгузорӣ ба муқаддасоти мамлакат маҳсуб меёбад. Мояи сарбаландист, ки тайи ин солҳо дар пойтахти ҷумҳурӣ ва аксар шаҳру навоҳии мамлакат парчампоя ва майдонҳои сарсабзи Парчами давлатӣ бунёд шуданд ва имрӯз низ дар дигар  шаҳру ноҳияҳо бунёди он идома дорад.

«Моҳият ва нақши Парчами давлатиро дар ҳаёти давлату давлатдорӣ ва сарнавишти халқ Асосгузори сулҳу ваҳдати миллӣ, Пешвои миллат, Президенти ҷумҳурӣ муҳтарам Эмомалӣ Раҳмон чунин ифода намудаанд: «Парчам ҳамчун ифодакунанда ва баёнгари ҳастии давлати соҳибистиқлол, рамзи иттиҳоду сарҷамъии мардуми мамлакат ва илҳомбахши кору пайкори фарзандони содиқу вафодори Ватан ба хотири пойдору бегазанд нигоҳ доштани дастовардҳои истиқлолият ва таҳким бахшидани пояҳои давлатдории миллӣ мебошад. Анъанаи  парчамдории халқи мо аз умқи таърихи чандинҳазорсола сарчашма гирифта, аҷдоди шарафмандамон ҳамчун посдорони фарҳангу тамаддуни куҳан роҳи тӯлонии давлатдориву парчамдориро тай намудаанд.

Парчами давлатии мо тибқи расму ойини парчамдорӣ бо рангу рамзҳо ва шаклу услуби миллии худ инъикоскунандаи таърихи деринаи халқи тамаддунсозамон мебошад»»,- гуфт  Ғайрат Азиззода.

Воқеан, Парчами давлатӣ шаҳрвандони мамлакатро муттаҳид намуда, ба фатҳу зафар, созандагию бунёдкорӣ ба хотири фардои дурахшони Ватан ҳидоят менамояд. Бо ҷилваи Парчами давлатӣ ҳастии моро эҳсоси баланди соҳибватанию соҳибдавлатӣ ва ифтихори миллӣ фаро мегирад. Ҳангоме ки ба шарафи варзишгарони музаффари миллат дар хориҷ аз мамлакат Парчами давлатӣ барафрохта мешавад, мо басо мамнуну шодмон, матинирода ва қавирӯҳ мегардем. Рангҳои сурху сафед ва сабзи Парчами давлатӣ мазмуну моҳияти таъриху сарнавишти халқу ватанро барои озодию истиқлолият, шарафу номус, бунёди ҳаёти осоишта, бахту саодат ва талош барои сарсабзу шукуфон гардонидани давлат ифода менамоянд.

Тавре Пешвои муаззами миллат муҳтарам Эмомалӣ Раҳмон таъкид намудаанд: «Муносибати самимона ба Парчам ва  дӯст доштани он таҷассуми бедории аҳли ҷомеа мебошад. Яъне ҳар як фарди Ватанро зарур аст, ки маъно ва муҳтавои Парчами давлатиро амиқан дарк намуда, бо заҳмати софдилона ва саъю талоши ватандӯстона ҷиҳати ободии сарзамини аҷдодӣ, таҳкими иқтидори иқтисодии давлати соҳибихтиёр ва парафшонии парчами саҳмгузорӣ намояд».

Ба ин хотир ба ҳар як  шаҳрванди Тоҷикистон сари ҳамчун парчам баланду рӯи чун парчам сурх, рӯзгори мисли парчам сабзу бахти чун парчам сафед орзу менамоем.