Таҳти раёсати муовини Сарвазири мамлакат Азим Иброҳим ҷаласаи навбатии Шўро оид ба ҳамоҳангсозии таҳсилоти касбӣ баргузор шуд

ДУШАНБЕ, 20.11.2019. /АМИТ «Ховар»/. 19 ноябр дар Донишгоҳи давлатии омўзгории Тоҷикистон ба номи Садриддин Айнӣ таҳти раёсати муовини Сарвазири Ҷумҳурии Тоҷикистон Азим Иброҳим бо иштироки роҳбарияти вазоратҳои маориф ва илм, фарҳанг, аъзои Шўро, инчунин роҳбарият ва деканони факултетҳои донишгоҳи мазкур ҷаласаи навбатии Шўро оид ба ҳамоҳангсозии таҳсилоти касбӣ баргузор гардид.

Дар ҷаласа ҷараёни амалишавии «Барномаи рушди Донишгоҳи давлатии омўзгории Тоҷикистон ба номи Садриддин Айнӣ барои солҳои 2014-2019» ва вазъи фаъолияти муассисаҳои таҳсилоти миёнаи касбии соҳаи фарҳанг мавриди муҳокима қарор дода шуд.

Аз рўи масъалаҳои баррасишаванда ҳисоботи муовини Вазири фарҳанги Ҷумҳурии Тоҷикистон Зевар Давлатзода ва ректори Донишгоҳи давлатии омўзгории Тоҷикистон ба номи Садриддин Айнӣ  Нуъмонҷон Ғаффорӣ шунида шуд.

Таъкид гардид, ки алҳол дар Ҷумҳурии Тоҷикистон 7 муассисаи таҳсилоти миёнаи касбӣ дар соҳаи фарҳанг фаъолият карда, аз рўи 48 ихтисос мутахассисон омода мекунад. Аз ҷумла, дастовардҳои муассисаҳои таҳсилоти миёнаи касбии соҳаи фарҳанг дар мисоли ҷамъбасти Озмуни ҷумҳуриявии «Тоҷикистон – Ватани азизи ман», ки бо иқдом ва дастгирии бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир шуд, баён гардида, хотиррасон карда шуд, ки дар озмун якчанд нафар донишҷўёни муассисаҳои таълимии соҳаи фарҳанг ғолиб дониста шуданд.

Ҳамзамон аз ҷониби Ҳукумати Ҷумҳурии Тоҷикистон қабул шудани «Барномаи рушди Донишгоҳи давлатии омўзгории Тоҷикистон ба номи Садриддин Айнӣ барои солҳои 2014-2019» саривақтӣ арзёбӣ гардида, дастоварду пешравиҳое, ки дар марҳилаи татбиқи ин барнома рўи кор омадаанд, барои рушди донишгоҳ муассир маҳсуб гардиданд.

Зимни муҳокима аз ҷониби муовини Сарвазири Ҷумҳурии Тоҷикистон Азим Иброҳим ва аъзои Шўро ба фаъолияти муассисаҳои таҳсилоти миёнаи касбии соҳаи фарҳанг ва вазъи иҷрои «Барномаи рушди Донишгоҳи давлатии омўзгории Тоҷикистон ба номи Садриддин Айнӣ барои солҳои 2014-2019», ки ҳамагӣ 52 фоизро ташкил медиҳад, баҳогузорӣ карда шуд.

Аз ҷумла, Азим Иброҳим сатҳи омода кардани кадрҳои соҳаи фарҳангро дар муассисаҳои таълимии соҳавӣ нокифоя арзёбӣ карда, норасоии адабиёти таълимӣ, нагузаштани омўзгорон аз курсҳои такмили ихтисос, ба талабот ҷавобгў набудани заминаи моддию техникии муассисаҳои таълимии мазкурро аз мушкилоти асосии мавҷудаи онҳо арзёбӣ намуд.

Бо дарназардошти ҳисоботи пешниҳодшуда ва мулоҳизаҳои баёнгардида аз ҷониби муовини Сарвазири Ҷумҳурии Тоҷикистон Азим Иброҳим дар назди роҳбарияти вазоратҳои фарҳанг, маориф ва илм, Донишгоҳи давлатии омўзгории Тоҷикистон ба номи Садриддин Айнӣ ҷиҳати бартараф кардани камбудиҳо ва ҳалли мушкилоти ҷойдошта супоришҳои дахлдор дода шуда, ҳамзамон дар назди аъзои Шўро низ вазифаҳои мушаххас гузошта шуданд.