Дастаи футзали Тоҷикистон бо Туркманистон, Ветнам ва Уммон бозӣ мекунад

ДУШАНБЕ, 07.12.2019 /АМИТ «Ховар»/. 6 декабр дар меҳмонхонаи «Олимпиа»-и шаҳри Ашқободи Туркманистон маросими қуръакашии Чемпионати Осиё-2020 оид ба футзал доир гардид. Дар ин бора АМИТ «Ховар» бо истинод ба Кумитаи миллии олимпии Тоҷикистон хабар медиҳад.

Дар натиҷаи қуръакашӣ дастаи мунтахаби Тоҷикистон ҳамроҳ бо дастаҳои Туркманистон, Ветнам ва Уммон ба гурӯҳи «А» ворид шуданд.

Дар Чемпионати Осиё-2020 оид ба футзал, ки аз 26 феврал то 8 марти соли оянда дар шаҳри Ашқободи Туркманистон доир мегардад, 16 дастаи беҳтарини қора дар чор гурӯҳ иштирок менамоянд. 5 дастаи беҳтарин қораи Осиёро дар Чемпионати ҷаҳон, ки моҳи октябр дар Литва баргузор мешавад, намояндагӣ мекунанд.

Натиҷаи қуръакашии Чемпионати Осиё-2020 оид ба футзал:

Гурӯҳи “А”: Туркманистон (мизбон), Ветнам, Тоҷикистон, Уммон;

Гурӯҳи “В”: Япония, Лубнон, Қирғизистон, Кувайт;

Гурӯҳи “С”: Ӯзбекистон, Баҳрайн, Чин, Индонезия;

Гурӯҳи “D”: Эрон, Тайланд, Кореяи Ҷанубӣ, Арабистони Саудӣ.

Чемпионати Осиё оид ба футзал маротибаи 16-ум баргузор мешавад. Дар 15 давраи гузаштаи чемпионат 12 маротиба дастаи мунтахаби Эрон ва 3 маротиба дастаи Япония ғолиб гардидаанд.

Акс аз ФФТ