ҲУҚУҚ ВА УҲДАДОРИҲОИ ИНТИХОБКУНАНДАГОН: мавзӯи суҳбати аъзои Комиссияи марказии интихобот ва раъйпурсӣ дар Хуҷанд

ДУШАНБЕ, 05.12.2019. /АМИТ Ховар/. Бо мақсади иҷрои талаботи қонунгузории Ҷумҳурии Тоҷикистон, баланд бардоштани маърифати ҳуқуқӣ ва ширкати фаъолона дар ҳаёти сиёсию ҷамъиятӣ, аз ҷумла дар маъракаҳои интихоботии соли 2020, вохӯрию суҳбатҳои аъзои КМИР ҶТ дар вилояти Суғд идома дорад. Вохӯрии навбатӣ 4 декабр дар Донишгоҳи давлатии Хуҷанд ба номи академик Бобоҷон Ғафуров доир гардид.

Тавре хабарнигори минтақавии АМИТ «Ховар» иттилоъ медиҳад, дар мулоқот Вазири маориф ва илми Ҷумҳурии Тоҷикистон Нуриддин Саид, коршиноси Комиссияи маркази интихобот ва раъйпурсии Ҷумҳурии Тоҷикистон Абдуллоҷон Нормуҳаммедов, намояндагон аз мақомоти иҷроияи ҳокимияти давлатии вилояти Суғд, раёсати адлия, сохторҳои марбутаи вилоят, роҳбарият ва доираи васеи устодону донишҷӯёни Донишгоҳ ширкат доштанд.

Зимни мулоқот иштирокдорон доир ба баргузории маъракаи муҳими сиёсии дарпешистода, ҳуқуқ ва уҳдадориҳои ҳар як интихобкунанда ибрози андеша намуда, инчунин дар мавзӯъҳои “Интихобот- ҳамчун падидаи ҷомеаи демократӣ”, “Илму маърифат — асоси муқовимат бо терроризму экстремизм ва ифротгароӣ”, “Маърифати ҳуқуқӣ ва нақши он дар ташаккули шахсияти ҷавонон”, “Таъмини тартиботи ҷамъиятӣ ва нақши ҷавонон дар он”, “Худшиносии миллӣ ва ифтихори ватандории ҷавонон- омили таҳкими субот дар ҷомеа” сухан гуфтанд.

Зимни мулоқот иштирокдорон донишҷӯёнро ба эҳтиром намудани арзишҳои миллӣ, шомил нашудан ба ҳар гуна ҳизбу ташкилоти террористӣ, омӯхтани илму дониш, дӯст доштани модар, Ватан ва ҳифзи анъанаи неки ниёгон даъват намуданд.