ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Соҳибкорони ватандӯсти Мастчоҳ бинои истиқоматии панҷошёна ва меҳмонхона месозанд

Январь 9, 2020 08:20

 ДУШАНБЕ, 09.01.2020 /АМИТ «Ховар»/.  Бахшида ба ҷашни 30-солагии Истиқлолияти давлатии Ҷумҳурии Тоҷикистон дар  ҷамоати шаҳраки Бӯстони  ноҳияи Мастчоҳ сохтмони бинову иншооти таъйиноташон  гуногун  ҷараён дорад. Корҳои сохтмонӣ дар иншооти мазкур то ҷашни истиқлолияти давлатӣ ба итмом расида,  ба истифода дода мешаванд. Дар ин бора ба АМИТ «Ховар» аз хадамоти  матбуоти  Раиси вилояти Суғд хабар доданд.

7 январи соли равон Раиси вилояти Суғд Раҷаббой Аҳмадзода ба ноҳияи Мастчоҳ сафари корӣ намуд. Зимни сафар мавсуф аз иншооти иҷтимоӣ ва варзишгоҳи маркази ноҳия дидан намуд. Иншооти варзишӣ бо 10 000 ҷойи нишаст аз тарафи Пажӯҳишгоҳи лоиҳакашии «САНИИОСП» омода гардидааст. Барои бунёди варзишгоҳи марказӣ тибқи нақша 11 млн сомонӣ пешбинӣ гардида, корҳои сохтмонӣ алҳол босуръат идома доранд.

Раиси вилоят ҳамчунин дар маркази ҷамоати шаҳраки Бӯстон  бо ҷараёни сохтмони Қасри фарҳанги ноҳия шинос гардид. Қасри фарҳанг бо 1000 ҷойи нишаст аз ҷониби Пажӯҳишгоҳи лоиҳакашии «САНИИОСП» омода шуда, тибқи нақша барои корҳои сохтмонӣ ва таҷҳизи иншоот беш аз 30 млн сомонӣ сарф хоҳад шуд. Фармоишгари ин ду иншооти мазкур Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон буда, паймонкор ҶДММ «Сохтмон»-и ноҳияи Мастчоҳ мебошад.

Бояд тазаккур дод, ки дар бунёди иншооти нави фарҳангӣ 4 гурӯҳ бо фарогирии 45 нафар сохтмончиён фаъолият доранд ва мувофиқи нақша, сохтмони Қасри фарҳанг бояд то соли равон ба анҷом расад.

Мариди зикр аст, ки Президенти Ҷумҳурии Тоҷикистон муҳтарам Эмомалӣ Раҳмон 26 декабри соли 2019 зимни ироаи Паёми навбатии хеш ба Маҷлиси Олии Ҷумҳурии Тоҷикистон иброз намуданд, ки «ман ба қудрати созандаву офарандаи мардуми сарбаланди тоҷик эътимод дорам ва як нуктаро дилпурона изҳор менамоям: мо ҳамаи иқтидору имкониятҳоро дорем, ки раванди ободкориву созандагиро беш аз пеш густариш бахшем, барои расидан ба ҳадафҳои миллиамон кӯшишу ғайрати бештар намоем, бо сарҷамъиву муттаҳидӣ камбудиҳои мавҷударо бартараф кунем, рушди устувору босуботи мамлакати азизамонро таъмин созем ва рӯзгори ҳар як хонадони Тоҷикистонро аз имрӯза беҳтар гардонем».

Бо такя ба Паёми Сарвари давлат дар маркази ноҳияи Мастчоҳ бо иқдоми соҳибкори инфиродӣ Абдунабӣ Каримов бунёди бинои истиқоматии панҷошёна оғоз карда шуд. Бинои истиқоматии панҷошёна дорои 20 ҳуҷраи истиқоматӣ, мағозаву таваққуфгоҳ барои нақлиёт буда, дар он барои зиндагии истиқоматкунандагон шароити хуб фароҳам оварда мешавад. Масоҳати умумии бино 450 метри мураббаъ буда, тибқи нақша барои сохтмон 4 миллион сомонӣ пешбинӣ шудааст. Ҳангоми сохтмону васлкунӣ зиёда аз 15 нафар бо кору маоши хуб таъмин мегарданд.

Пас аз мавриди истифода қарор гирифтан дар маркази тиҷоратӣ ва нуқтаҳои хизматрасонии бинои бунёдшаванда 10  нафар сокинон бо ҷойи кори доимӣ таъмин хоҳанд шуд.

Дар баробари дигар иншооти мазкур барои сохтмони меҳмонхонаи замонавӣ санги асос гузошта шуд. Меҳмонхонаи мазкур аз ҷониби соҳибкори инфиродӣ Абдуваҳҳоб Ҳасанзода бунёд гардида, аз се ошёна иборат мебошад.

Меҳмонхона дорои 25 ҳуҷра ва 50 рахти хоб, толори варзишӣ, ҳавзи шиноварӣ ва таваққуфгоҳ буда, барои меҳмонон маркази хизматрасонӣ низ ташкил карда мешавад. Масоҳати умумии бино 3000 метри мураббаъ буда, барои сохтмон зиёда аз 12 миллион сомонӣ масраф гардида, ба корҳои сохтмониву васлкунӣ зиёда аз 20 нафар ҷалб мегарданд.

Бояд тазаккур дод, ки баъди ба истифода супоридани иншоот дар меҳмонхона 10 нафар бо ҷойи кори доимӣ таъмин хоҳанд шуд.

Ёдовар мешавем, ки имрӯз  соҳибкорони ватандӯст бо ҷонибдорӣ аз сиёсати пешгирифтаи Ҳукумати мамлакат дар ободонии Ватани азизамон  саҳми арзандаи худро гузошта истодаанд.

Январь 9, 2020 08:20

Хабарҳои дигари ин бахш

Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Эмомалӣ Раҳмон: «Ба рушди Вилояти Мухтори Кӯҳистони Бадахшон зиёда аз 25 миллиард сомонӣ равона шудааст»
Дар Хадамоти гумрук моҳияти қонунҳои миллӣ тавзеҳ дода шуд
Эмомалӣ Раҳмон: «Дар Вилояти Мухтори Кӯҳистони Бадахшон амалисозии 9 барномаи рушди иҷтимоиву иқтисодӣ идома дорад»
Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Байни вилоятҳои Хатлони Тоҷикистон ва Ленингради Русия Созишномаи ҳамкорӣ ба имзо расид
Дар ВМКБ беш аз 1000 иншоот ба истиқболи 35-солагии Истиқлоли давлатӣ мавриди истифода қарор гирифт
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ бо лоиҳаҳои биноҳои истиқоматӣ бо маркази хизматрасонию тиҷоратӣ, таваққуфгоҳи нақлиётӣ, меҳмонхона ва майдончаи варзишии кӯдакон шинос шуданд