Китобхонаи Ҷамоати деҳоти «Сари Хосор»-и ноҳияи Балҷувон бо асарҳои тозанашри бачагона ва адибони классику муосир ғанӣ гардонида шуд

БАЛҶУВОН, 25.01.2020 /АМИТ «Ховар»/. Дар маркази Ҷамоати деҳоти «Сари Хосор»-и ноҳияи Балҷувон китобхона фаъолият дорад, ки сокинон аз он ба таври васеъ истифода мебаранд. Китобхона дорои теъдоди зиёди адабиёт ва толори хониш мебошад. Тавре корманди китобхона Ҷамила Алиқулова иттилоъ дод, Ҷиғагул Азизова хонандаи фаъоли китобхона буда, ба Озмуни ҷумҳуриявии «Фурӯғи субҳи доноӣ…» омодагӣ мегирад. Ӯ то имрӯз адабиёти зиёдеро мутолиа кардаасту  мехоҳад дониши худро васеъ намуда, дар ин озмуни ҷумҳуриявӣ  сазовори ҷои ифтихорӣ гардад.

Ба гуфти Ҷиғагул Азизова, имрӯз хонандагон бояд бештар ба китобхонаю китобхонӣ рӯ оваранд, зеро танҳо шахси бодонишу ҳушманд метавонад дар пешрафти мамлакати худ саҳм гузорад. Аксари хонандагони муассиса таътили зимистонаро дар ин китобхона гузарониданд. Зеро ба китобхона асарҳои тозанашри бачагона ва адибони классику муосир оварда шудаанд. Акнун хонандагон имкон доранд дар озмунҳои ҷумҳуриявӣ  иштирок кунанд.

Озмуни ҷумҳуриявии «Фурӯғи субҳи доноӣ…», ки бо ибтикори Пешвои миллат муҳтарам Эмомалӣ Раҳмон соли 2019  роҳандозӣ гардид, самараи хуб ба бор овард ва ҳазорон нафар сокинони мамлакат дар пайравии он ба хондани китобу аз ёд кардани шеъру достонҳо шурӯъ карданд.

Дар Паёми навбатии хеш Президенти мамлакат муҳтарам Эмомалӣ Раҳмон оид ба ташкили китобхонаҳо ва дуруст ба роҳ мондани фаъолияти онҳо дар ҳамаи ташкилоту корхона ва муассисаҳо ва ҳамасола   идома додани Озмуни «Фурӯғи субҳи доноӣ…» сухан гуфтанд.

Ба иттилои манбаъ, хуб мешуд ҳамин гуна китобхонаҳо дар ҳамаи деҳаҳо ташкил карда шаванд, то сокинон ба китоб дастрасии бештар пайдо кунанд.