Нишасти матбуотӣ: Беш аз 3,3 миллион нафар муштариёни алоқаи мобилӣ симкортҳояшонро бо корти «ID» аз нав ба қайд гирифтаанд

Январь 27, 2020 13:38

ДУШАНБЕ, 27.01.2020 /АМИТ «Ховар»/. Ҳоло қариб 4 миллион нафар  муштариёни  алоқаи  мобилӣ дар мамлакат симкортҳояшон  бо шиносномаи намунаи соли 1996 дар фаъолият буда, симкортҳояшонро аз нав ба қайд нагирифтаанд. Дар ин хусус 27 январ муовини сардори Хадамоти алоқаи назди Ҳукумати Ҷумҳурии Тоҷикистон Адолат Абдураҳмонзода ба намояндагони расонаҳои хабарӣ иттилоъ дод. Мавсуф гуфт, ки то 31 декабри соли 2019   3 миллиону  36 ҳазору  433 нафар муштариёни алоқаи мобилӣ  бо шиносномаи намунаи соли  2014 ё  корти «ID» симкортҳояшонро дар ширкатҳои мобилӣ аз нав ба қайд гирифтаанд.

Бояд тазаккур дод, ки 15 феврал  муҳлати азнавбақайдгирии симкортҳои мобилӣ дар мамлакат ба анҷом мерасад. Оё то ин муддат Қарори Ҳукумати  Ҷумҳурии Тоҷикистон  аз 15 августи соли 2019 «Дар бораи ворид намудани тағйиру иловаҳо ба Қарори Ҳукумати Ҷумҳурии Тоҷикистон  аз 30 апрели соли 2016 «Дар бораи тартиб ва  талаботи  пайвастшавӣ ба шабакаи алоқаи барқӣ  ва хизматрасониҳои вобаста ба он» иҷро мегардад?

Дар посух ба ин савол муовини сардори Хадамоти алоқаи назди Ҳукумати Ҷумҳурии Тоҷикистон Илҳомҷон Атоев гуфт, ки  бо истифода аз тамоми имконоти мавҷуда умед аст то 15 феврали соли равон Қарори Ҳукумати мамлакат иҷро гардад. Номбурда зикр кард, ки  дар Тоҷикистон  теъдоди  истифодабарандагони симкортҳои алоқаи мобилӣ  беш аз 6,8 миллион нафарро ташкил медиҳад, ки аз ин омор зиёда аз 4,8 миллион нафарашон муштариёни фаъол  мебошанд.

Посухи мовини сардори Хадамоти алоқаи мамлакат  дар ҳолест, ки чанде қабл дар суҳбат бо хабарнигори АМИТ «Ховар» мовини сардори Хадамоти шиносномавию бақайдгирии Вазорати корҳои дохилии мамлакат, полковники милитсия Нуралӣ Сафарзода гуфта буд, ки «шурӯъ аз моҳи марти соли 2014, ки бори нахуст дар Ҷумҳурии Тоҷикистон шиносномаи нави шаҳрвандии Ҷумҳурии Тоҷикистон — корти «ID» ҷорӣ гардид, то 31 декабри соли 2019 беш аз 3 миллион нафар шаҳрвандони Ҷумҳурии Тоҷикистон аз ҷониби шуъбаҳои шиносномавии Хадамот бо  корти «ID» таъмин гардиданд».

Полковники милитсия зикр намуда буд, ки иқтидори пурраи Хадамоти  шиносномавию бақайдгирии Вазорати корҳои дохилии ҷумҳурӣ дар асоси реҷае, ки вуҷуд дорад, таъмини  1,2,- 1,3 миллион ва агар фаъолиятро пурзӯр намоем, то 1,5 миллион шиноснома дар як сол мебошад. Мутобиқи Қарори Ҳукумати Ҷумҳурии Тоҷикистон  шиносномаи намунаи соли 1996  баъди 40-солагӣ бемуҳлат аст. Ягон  сохтор,  воҳид, идора ё шаҳрванд ҳуқуқ надорад, ки шиносномаи соли 1996-ро эътироф накунад. Муҳлати шиносномаи  намунаи соли 1996 то рӯзе, ки шаҳрванд  дар қайди ҳаёт аст,  эътибор дорад. Хусусан нафақахӯрон,  шахсони пиронсол ва умуман дигар шаҳрвандон, ки агар симкорт надошта бошанд  ҳоҷат надоранд, ки шиносномаи намунаи соли 1996-ро  ба корти «ID» -шиносномаи намунаи соли 2014 иваз намоянд. Боз ҳам такрор менамоям, ки агар симкорт надошта бошанд. Ин гурӯҳи шаҳрвандон имкон доранд, ки камтар таваққуф намоянд, то издиҳоме, ки имрӯзҳо  дар нуқтаҳои шиносномавию бақайдгирии ҷумҳурӣ мушоҳида мегардад,  бартараф карда шавад, баъдан фурсат меёбанд то шиносномаи соли 1996 –ро ба корти «ID» бидуни саросемагӣ иваз намоянд.

 

Январь 27, 2020 13:38

Хабарҳои дигари ин бахш

МАСЛИҲАТИ МУТАХАССИС. Оё фарзанди шумо барои ба мактаб рафтан омода аст?
Тоҷикистон ва Амрико ҳамкориро дар соҳаи тандурустӣ тақвият медиҳанд
Дар Душанбе доир ба Истиқлоли давлатӣ ҳамчун рукни асосии идеологияи миллӣ ҳамоиши ҳизбиён баргузор шуд
Дар Балҷувон дар мавзуи «Сулҳу субот – омили рушди устувори соҳаи сайёҳӣ» вохӯрии судманд доир гардид
Ҳамкории Тоҷикистон бо Барномаи рушди СММ дар самти ҳифзи ҳуқуқи инсон муҳокима карда шуд
Муовини Сарвазири Тоҷикистон бо сохтмони маҳаллаи навбунёд дар деҳаи Зарангаки ноҳияи Рашт шинос шуд
Нақши занон дар мақомоти олии қонунгузории Тоҷикистон дар даврони соҳибистиқлолӣ назаррас аст
Бахшида ба Рӯзи кормандони тандурустии Тоҷикистон ҷаласаи тантанавӣ баргузор гардид
ИМРӮЗ — РӮЗИ КОРМАНДОНИ СОҲАИ ТИБ. Дар Тоҷикистон 5254 муассисаи тиббӣ фаъолият менамояд
Дар ноҳияи Кӯшониён Маркази саломатӣ ифтитоҳ гардид
Дар Душанбе Форуми дуюми байналмилалӣ оид ба масъалаҳои маъюбӣ доир гардид
Дар ноҳияи Айнӣ оид ба пешгирии истифодаи ғайриқонунии неруи барқ вохӯрӣ баргузор шуд