Ноҳияи Лахш: ҷамъоварии 100 ҳазор тонна картошка таъмин гардид

ДУШАНБЕ, 23.01.2019 /АМИТ «Ховар»/.  Кишоварзони ноҳияи Лахш соли гузашта дар ҳамаи шаклҳои кишоварзӣ аз  майдони 4688 гектар 100 ҳазор тонна картошкаи хушсифат рӯёниданд, ки аз ин шумора 67 ҳазору 407 тоннаашро хоҷагиҳои деҳқонии ноҳия  ҷамъоварӣ намудаанд.

Маҷмӯи умумии даромади  кишоварзони  ноҳияи Лахш  соли  2019 ба 338 миллиону  185,2  ҳазор  сомонӣ расид, ки   нисбат ба ҳамин давраи соли гузашта 688  ҳазор  сомонӣ зиёд   мебошад. Ин пешрафт барои  таъмини рушди устувори иҷтимоию иқтисодии соҳаҳои хоҷагии халқ равона гардидааст. Дар ин бора аз Мақомоти иҷроияи ҳокимияти давлатии ноҳияи Лахш ба хабарнигори АМИТ «Ховар» иттилоъ доданд.

Ба иттилои манбаъ,  дурнамои кишти картошка низ барзиёд иҷро гардид. Ба ҷойи 2800 гектари пешбинигардида дар ҳамаи сохтори кишоварзӣ  3147 гектар картошка кишт шудааст, ки нисбат ба дурнамо  347 гектар зиёд аст.

Дар ноҳия ҷиҳати зиёд намудани истеҳсоли маҳсулоти кишоварзӣ, бунёди майдони боғ, барқароркунии боғҳои кӯҳна ва зиёд намудани майдони кишти зироат тадбирҳои зарурӣ андешида шуданд.

Тибқи дурнамои рушди соҳаи кишоварзии ноҳия соли 2019 бунёди зиёда аз 60 гектар боғи нав пешбинӣ гардида буд. Хушбахтона, бо ташаббуси деҳқонони ноҳия дар 78 гектар боғҳои нав бунёд гардида, 15 гектар боғҳои кӯҳна барқарор карда шуданд.