Дилмурод Давлатзода: «Зиёд намудани нафақаи маъюбон орзуи деринаи 30 ҳазор нафақахӯр мебошад»

ДУШАНБЕ, 05.02.2020 /АМИТ «Ховар»/. Зиёд намудани нафақаи маъюбон аз ҷониби  Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон —  ин орзую умеди деринаи 30 ҳазор нафақахӯр мебошад,- иброз дошт 4 феврал зимни нишасти хабарӣ директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Дилмурод Давлатзода.

Ба зикри номбурда, нафақагирони маъюбе, ки тибқи қонуни пешина  нафақаи паст мегирифтанд, шурӯъ аз моҳи сентябр нафақаи онҳо аввал 15 ва сипас 50 фоизи дигар зиёд карда мешавад.

«Бояд гуфт, ки ин на танҳо ба нафақагирони маъюби гурӯҳи 1 ва 2 дахл дорад, балки дар маҷмӯъ ин нуктаҳои Паёми Пешвои миллат ба он нафароне, ки шароити бади зиндагӣ ва ягон  сарчашмаи даромад надоранд, равона гардидаанд.  Зиёд шудани нафақа дар хаҷми 15 фоиз ба тамоми нафақагирон дахл дошта, шурӯъ аз моҳи сентябр ин иқдом роҳандозӣ карда мешавад»,-гуфт Дилмурод Давлатзода.

Ёдовар мешавем, ки айни  замон дар ҷумҳурӣ 711 ҳазору 222 нафар нафақахӯрон ба қайд гирифта шудаанд.