ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар ноҳияи Бобоҷон Ғафуров соҳибкори маҳаллӣ фабрикаи парандапарварӣ бунёд мекунад

ДУШАНБЕ, 08.04.2020. /АМИТ «Ховар»/. Ба шарафи ҷашни 30-солагии Истиқлолияти давлатӣ дар ҳудуди ҳар як ҷамоати ноҳияи Бобоҷон Ғафуров дар самти таъсиси коргоҳу ҷойҳои нави корӣ бунёди 21 корхонаи саноатӣ, 9 гармхона, 3 сардхона, 10 фермаи  чорводорӣ ва парандапарварӣ ба нақша гирифта шудааст.

Бино ба иттилои хабарнигори АМИТ «Ховар» дар вилояти Суғд Абдуаҳад  Дадабоев, имрӯзҳо дар яке аз ҷамоатҳои дурдасти ноҳия-Ҷамоати деҳоти ба номи Дадобой Холматов аз ҷониби соҳибкори маҳаллӣ, роҳбари ҶДММ «Насиби ширин» дар масоҳати қариб 17 гектар сохтмони фабрикаи парандапарварӣ идома дошта, баъди  мавриди истифода қарор гирифтани он қариб 50 нафар бо ҷойи кор таъмин мегарданд.

Фабрикаи парандапарварӣ дорои якчанд  бино  барои парвариши паранда ва дигар иншооти ёрирасон  буда, бо таҷҳизоти замонавӣ муҷаҳҳаз аст ва нигоҳубини паранда, раванди тақсими обу дон ва дигар корҳое, ки ба парвариши паранда нигаронида шудаанд, тавассути технология анҷом дода мешаванд.

Итминон аст, ки бунёди чунин фабрикаҳо солҳои наздик метавонад ба рушди соҳа, истеҳсоли маҳсулоти ивазкунандаи воридотӣ, инчунин таъсиси ҷойҳои нави корӣ ва таъмини аҳолии мамлакат бо маҳсулоти ватанӣ заминаи воқеӣ гузорад.

Аз оғози соли равон то имрӯз дар ноҳияи Бобоҷон Ғафуров танҳо аз ҷониби соҳибкорони маҳаллӣ  5 коргоҳу фабрикаи нави истеҳсолӣ бо зиёда аз 50 ҷойи кор,  чун  ҶДММ «Хубҷамъ Инвест» машғул ба истеҳсоли орд, ҶДММ «Амина К» машғул ба истеҳсоли хӯрокаи паранда, ҶДММ «Абдуллоҷон Самиев» барои коркарди регу шағал,  Фабрикаи парандапарварии ҶДММ «Дӯсти Азиз» ва ҶДММ  «Сехи дӯзандагии Амир» бунёд гардидаанд, ки ин иншоот, бешак  дар ғанӣ гардонидани буҷаи маҳаллӣ ва некӯаҳволии сокинони ноҳия саҳми назаррас мегузоранд.

Инчунин давоми семоҳаи аввали имсол аз ҷониби соҳибкорон дар ҷамоатҳои ноҳия иншооти иҷтимоӣ, аз қабили 1 муассисаи таълимӣ барои 624 хонанда, 3 бинои иловагӣ дар назди муассисаҳои таълимӣ, азнавбарқароркунии 2 муассисаи таълимии садамавӣ ва 3 кӯдакистон,  сохтмони 4 хонаи саломатӣ ва бинои иловагӣ дар  2 маркази саломатӣ, 37 майдончаи варзишӣ, аз  ҷумла 18 адади он аз ҳисоби буҷети ноҳия ба истифода дода шудаанд.