«МО ҲОМИИ ИН ВАТАНЕМ!». Таҳти ин унвон ба ифтихори Рӯзи даъватшаванда дар Ёвон раҳпаймоӣ доир гардид

 ЁВОН, 03.04.2020. /АМИТ «Ховар»/.  Ба ифтихори Рӯзи даъватшаванда дар ноҳияи Ёвон раҳпаймоии ҷавонон, хизматчиёни ҳарбӣ, даъватшавандаҳо ва донишҷӯёни муассисаҳои миёнаи касбӣ таҳти унвони «Мо ҳомии ин ватанем» баргузор гардид. Ҷавонон бо нидоҳои ватандӯстона  3000 метр роҳро тай намуда, ба Комиссариати ҳарбии ноҳия омаданд.

Дар саҳни Комиссариати ҳарбӣ бо иштироки роҳбарони мақомоти ҳифзи ҳуқуқ, собиқадорони меҳнат, ҷанговарони байналмилалӣ, сарбозону афсарони Қисми низомии 6593 ва волидони даъватшавандаҳо ба муносибати Рӯзи даъватшаванда ҷамъомади тантанавӣ доир  шуд.

Раиси ноҳия Ҷамшед Саидзода иброз намуд, ки «таҷлили Рӯзи даъватшаванда-ин арҷ гузоштан ба марзу буми аҷдодӣ, Артиши миллӣ ва пурра намудану таҳким бахшидани сафҳои Қувваҳои Мусаллаҳи Тоҷикистон мебошад. Вақте мебинем, ки фарзандони мо ба монанди падарони баору номуси худ бо ғайрату ҷасорат ва ба хотири ободии Ватан хизмати ҳарбиро ихтиёр мекунанд, умед ва бовариямон ба насли наврас, ба ояндаи орому осоишта қавитар мегардад».

Модарону хоҳарон мувофиқи расму оини тоҷикӣ ба 63 нафар наваскароне, ки хизмати Ватанро ихтиёр кардаанд, нон газонида, ба онҳо садоқату вафодорӣ ва хизмати сарбаландона орзу намуданд.

Барномаи консертии аҳли фарҳанги ноҳия ва таҳти суруду мусиқӣ хурсандӣ кардани даъватшавандаҳову волидони онҳо ба ҷамъомад рангу ҷилои дигар бахшид.