Пахтакорони Суғд азм доранд дар беш аз 60 ҳазор гектар кишти чигит гузаронанд

ДУШАНБЕ, 02.04.2020. /АМИТ «Ховар»/. Имсол пахтакорони вилояти Суғд азм доранд дар майдони беш аз 60 ҳазор гектар кишти чигит гузаронанд.

Дар вилоят  корҳои кишти пахта рӯз аз рӯз вусъат гирифта,  дар майдонҳои 7 ноҳияи пахтакор, чун Ашт, Б.Ғафуров, Ҷ.Расулов, Конибодом, Мастчоҳ, Спитамен ва Зафаробод беш аз 15 навъи тухмиҳои пунбадона кишт мешаванд. Инҳо асосан тухмиҳои маҳаллӣ — «Хуҷанд-67», «Ориёӣ» ва «Ирам-1», ҳамчунин тухмиҳои навъи воридотии хориҷӣ, аз қабили чинии  «Синтзян» ва «Тиннян», туркии «Флеш» ва «Глория» мебошанд. Дар ин бора аз Сарраёсати идораи кишоварзии вилояти Суғд ба хабарнигори минтақавии АМИТ «Ховар»  иттилоъ доданд.

Зикр гардид, ки то  31 март дар  миқёси вилоят дар масоҳати 345 гектар, аз ҷумла дар ноҳияи Конибодом 204 га, Бобоҷон Ғафуров 56 га ва Ашт 55 га чигит кошта шудааст. Пахтакорони вилоят азм доранд бо истифода аз ҳавои мусоиди баҳорӣ ҳарчӣ зудтар маъракаи кишти пунбадонаро ба анҷом расонанд.

Бояд гуфт, ки соли гузашта пахтакорони вилоят дар майдони 57 ҳазор гектар кишти чигит гузаронида, ба ҷойи 129 050 тонна дар маҷмӯъ 140 283 тонна «тиллои сафед» ҷамъоварӣ намуданд.