«Сомон Эйр»: фирефтаи ҳиллаи қаллобони чиптафурӯш нагардед!

ДУШАНБЕ, 03.04.2020. /АМИТ «Ховар»/. Дар иртибот ба хуруҷи коронавирус дар баъзе давлатҳои ҷаҳон қаллобоне пайдо шудаанд, ки  бо истифода аз вазъияти баамаломада тариқи интернет фурӯши  чиптаҳои ҳавопаймоиро ба хатсайрҳои мавҷуднабуда пешниҳод менамоянд. Дар ин росто,  ширкати ҳавопаймоии «Сомон Эйр» ба диққати шаҳрвандоне, ки хатсайрҳои махсусро аз Москва ба самти Душанбе интизоранд, мерасонад, ки фирефтаи чунин қаллобон нашуда, ҳушёриро аз даст надиҳанд.

Бояд тазаккур дод, ки мутобиқи дастури Агентии авиатсияи граждании назди Ҳукумати Ҷумҳурии Тоҷикистон ҷиҳати пешгирӣ аз паҳншавии бемории коронавирус ва роҳ надодан ба сироятёбии шаҳрвандони Ҷумҳурии Тоҷикистон ширкати ҳавопаймоии «Сомон Эйр» аз 20 марти соли 2020 иҷрои хатсайрҳои мунтазами байналмилалиро аз Тоҷикистон ва ба он қатъ намуд. Санаҳои 20, 22 ва 24 март ширкати ҳавопаймоии «Сомон Эйр» се парвози махсусро аз Душанбе ба Москва ва аз Москва ба Душанбе иҷро намуд.

Оид ба анҷом додани парвозҳои махсуси эҳтимолӣ ширкати ҳавопаймоии «Сомон Эйр» қаблан мусофиронро огоҳ менамояд.