Норак: Фестивали «Ҳафтаи китоби кӯдакону наврасони Тоҷикистон» дӯсторони мутолиаро сарҷамъ кард

НОРАК, 04.04.2020. /АМИТ «Ховар»/. Дар китобхонаҳои марказонидашудаи шаҳри Норак даври аввали Фестивали ҷумҳуриявии «Ҳафтаи китоби кӯдакону наврасони Тоҷикистон» таҳти унвони «Тараннумгари сухан» оғоз гардид, ки то  8 апрел идома меёбад. Дар ин бора ба хабарнигори АМИТ «Ховар» аз мақомоти иҷроияи ҳокимияти давлатии шаҳри Норак иттилоъ доданд.

Мақсади асосии баргузории фестивал ин  ҷалби насли наврас ба мутолиаи китоб, ташаккул ва такомули беҳтарин малакаҳои хониш, баланд бардоштани сатҳи фарҳанги иттилоотии кӯдакону наврасон ва ба ин восита дар замири онҳо тарбия  намудани ҳисси ифтихори миллӣ, ватандӯстӣ ва гиромидошти арзишҳои милливу умумибашарӣ мебошад.

Дар шаҳри Норак 16 адад китобхона бо теъдоди умумии 183 928 нусха китоб фаъолият доранд. Дар се моҳи аввали имсол 3596 нафар хонанда аз китобхонаҳо китоб гирифтаанд, ки нисбат ба ҳамин давраи соли гузашта 283 нусха зиёд мебошад.