Бар асари сӯхтор дар ноҳияи Айнӣ ду тифл ҳалок гардиданд

ДУШАНБЕ, 12.05.2020 /АМИТ «Ховар»/. 10 май дар деҳаи Курути ноҳияи Айнӣ хонаи сокини 31-солаи деҳаи мазкур оташ гирифта, ду тифли хурдсол ба ҳалокат расиданд. Дар ин бора аз Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба АМИТ “Ховар” хабар доданд.

Ба иттилои манбаъ, нимаи рӯзи якшанбе хонаи сокини 31-солаи ин деҳа оташ гирифта, бо талоши кормандони Хадамоти оташнишонии ноҳияи Айнӣ  сӯхтор пурра хомӯш карда шуд. Вале мутаассифона, фарзандони соҳиби хона, ки яке дусола буду дуюмӣ яксола, бар асари дуди ғализ дар ҷойи хобашон ба ҳалокат расиданд.

Мақомот мегӯянд, ки сабаби аслии сӯхтор беназорат гузоштани асбоби барқӣ будааст. Аммо ҳоло мизони зарари расида ва сабаби  аслии сар задани сӯхтор аз ноқили барқ ё таҷҳизоти дигар дақиқ гуфта нашудааст.