COVID-19. Кумаки моддии Сарвари давлат ба табибон ва нафарони мубталои бемории коронавирус дар вилояти Суғд

ХУҶАНД, 18.05.2020. /АМИТ «Ховар»/. Тавре қаблан хабар дода будем, бо мақсади дастгирии иҷтимоию иқтисодии табибон ва нафароне, ки ба бемории коронавирус мубтало гардидаанд,  бо супориши Сарвари давлат аз пойтахти мамлакат ба вилояти Суғд кумаки моддӣ- 140 адад мошини пурбор бо 900 тонна маводи озуқа ва доруворӣ, дар умум ба маблағи 6,5 миллион сомонӣ ба маркази вилоят фиристода шуд.

Тавре ба хабарнигори АМИТ «Ховар» аз Мақомоти иҷроияи ҳокимияти давлатии шаҳри Хуҷанд иттилоъ доданд, кумаки зикршуда  табибон ва тамоми беморони ба  короновирус мубталошудаи шаҳру навоҳии вилоятро фаро гирифта, ба ҳамаи онҳо маводи озуқаворӣ, аз  қабили орд, биринҷ, равған, шакар, картошка, сабзӣ, пиёз ва маводи зарурии доруворӣ тақсим мегардад.

Илова бар ин ба табибони беморхонаҳои миқёси вилоят сару либоси тиббӣ, ниқоб, дастпӯшак, асбоби муҳофизатӣ, маводи  безараргардонии антисептикӣ ва дигар воситаҳои техникии тиббӣ кумак карда мешавад.

Дар ин замина бо мақсади мақсаднок ва шаффофу суроғавӣ дастрас намудани маводи доруворӣ ва молу маҳсулоти хӯрокворӣ аз ҳисоби аъзои Ҳукумати мамлакат, кормандони масъули Дастгоҳи иҷроияи Президенти Ҷумҳурии Тоҷикистон, Ситоди ҷумҳуриявӣ оид ба пешгирии паҳншавии бемории короновирус COVID-19 ва Вазорати тандурустӣ ва ҳифзи иҷтимоии аҳолии мамлакат гурӯҳи корӣ таъсис дода шудааст.