Муовинони вазирони корҳои хориҷии Тоҷикистон ва Италия телефонӣ суҳбат намуданд

ДУШАНБЕ, 29.05.2020 /АМИТ «Ховар»/. Имрӯз суҳбати  телефонии муовини Вазири корҳои хориҷии Ҷумҳурии Тоҷикистон Музаффар Ҳусейнзода бо муовини Вазири корҳои хориҷӣ ва ҳамкории байналмилалии Ҷумҳури Италия Манлио ди Стефано баргузор гардид.

Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, ҷонибҳо дар мавриди раванди мубориза бо ҳамагирии СOVID-19 дар кишварҳои худ мубодилаи афкор намуда, ҳамзамон дурнамои ҳамкории дуҷонибаи ду давлатро дар ин самт муҳокима карданд.

Зимни суҳбат сатҳи робитаҳои дуҷонибаи Тоҷикистон ва Италия дар соҳаҳои мухталиф, аз ҷумла сиёсӣ, иқтисодӣ ва гуманитарӣ, инчунин нақшаи чорабиниҳои муштарак дар соли ҷорӣ дар сатҳи дуҷониба ва байналмилалӣ мавриди баррасӣ қарор гирифт. Дар ин робита, аҳамияти баргузории чорабиниҳои банақшагирифташудаи дуҷониба, аз ҷумла вохӯриҳо дар сатҳи олӣ ва бизнес-форум бо иштироки намояндагони ширкатҳои пешрафта ва доираҳои тиҷоратии ду давлат баъди ба эътидол омадани вазъи ҷаҳонӣ вобаста ба ҳамагирӣ таъкид гардид.

Муовинони вазирон инчунин масъалаҳои ҳамкории Тоҷикистон ва Италияро дар чаҳорчӯби Иттиҳоди Аврупо ва дигар ниҳодҳои байналмилалӣ баррасӣ карданд.