«ШИФО ВА ҲАМДИЛӢ». Таҳти ин шиор соҳибкори ватанӣ Шамсулло Соҳибов ба табибони ноҳияи Мастчоҳ кумак расонид

ДУШАНБЕ, 13.06.2020. /АМИТ «Ховар»/. Субҳи имрӯз аз ҷониби соҳибкори ватанӣ Шамсулло Соҳибов дар доираи иқдоми неку башардӯстона таҳти шиори «Шифо ва ҳамдилӣ» ба муассисаҳои Кумаки аввалияи тиббию санитари ноҳияи Мастчоҳи вилояти Суғд либосҳои муҳофизатӣ ва ниқобу айнакҳои махсуси тиббӣ дастрас ва тақдим карда шуданд, хабар медиҳад АМИТ «Ховар» бо истинод ба рӯзномаи «Нигоҳи халқ».

Ба иттилои манбаъ, дар маҷмӯъ, 50 адад либосҳои муҳофизатии тиббӣ, 55 адад ниқобҳои махсус ва ҳамчунин ниқобу айнакҳои тиббӣ аз номи ин соҳибкор ба табибони ноҳяи тақдим гардид.

Раиси Кумитаи иҷроияи ноҳиявии ҲХДТ Дилшод Зокиров аз ин иқдоми соҳибкори худшиносу ватандӯст истиқбол намуда, онро пайравии шоиста ба ташаббусҳои созандаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон донист.

Ёдовар мешавем, ки қаблан Шамсулло Соҳибов дар доираи иқдоми башардӯстона ба беморхонаҳои шаҳру ноҳияҳои вилояти Хатлон, минтақаи Кӯлоб ва ноҳияи Роштқалъаи Вилояти Мухтори Кӯҳистони Бадахшон дар шакли маводи гуногуни доруворӣ, либосҳои тиббии муҳофизатӣ, айнакҳои тиббии муҳофизатӣ, дастпӯшакҳо, ниқобҳои тиббӣ, хилъатҳо, маводҳои антисептикӣ, маводҳои поккориву тамизкорӣ ва ғайра кумак расонид.