Германия ба Тоҷикистон мавод ва таҷҳизоти тиббӣ дастрас намуд
ДУШАНБЕ, 30.07.2020 /АМИТ «Ховар»/. Бо мақсади пешгирӣ ва мубориза бо коронавируси навъи нави COVID-19 Ҷумҳурии Федеративии Германия ба Ҷумҳурии Тоҷикистон мавод ва таҷҳизоти тиббӣ дастрас намуд, ки маблағи умумии он 1 миллион евроро дар бар мегирад. Дар ин бора аз Вазорати тандурустӣ ва ҳифзи иҷтимоии аҳолии мамлакат ба АМИТ “Ховар” хабар доданд.
Мавод ва таҷҳизоти тиббии мазкур аз 16 номгӯй: воситаҳои муҳофизатии яккаратаи кормандон, маводи безараргардонӣ, термометрҳои фосилавӣ, дастгоҳи нафасдиҳии сунъӣ ва воситаҳои нобудсозии маводи истифодашуда иборат буда, он дар асоси таҳлили эҳтиёҷот ва таҳти дастури Созмони умумиҷаҳонии тандурустӣ тартиб дода шудааст.
Маводи тиббӣ ба Беморхонаи бемориҳои сироятии шаҳри Душанбе супорда шуда, дар маросими он муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода, Сафири Германия дар Тоҷикистон Андреас Протманн ва намояндаи маҳаллии Бонки Рушди Германия KfW Манучеҳр Бақоев иштирок намуданд.
Гуфта мешавад, ки таҷҳизот дар доираи маблағгузории гранти махсус аз ҷониби Вазорати федералии ҳамкории иқтисодӣ ва рушди Германия тавассути Бонки Рушди Германия — KfW дастрас шуда, ба Ҷумҳурии Тоҷикистон барои мубориза бо COVID-19 пешкаш шудааст.
11 адад дастгоҳи нафасдиҳии сунъии истеҳсоли ширкати Ҳамилтон (Швейтсария) бо маҷмӯи пурраи қисмҳои якдафъаина барои фаъолияти беист давоми 1 сол дар шароити сарбории пурра пешбинӣ шудааст. Ин таҷҳизот ба Маркази миллии тиббии «Шифобахш», Маркази ҷумҳуриявии клиникии бемориҳои дил, беморхонаҳои марказии ноҳияҳои Данғара ва Ёвон дода мешаванд. Ин беморхонаҳо инчунин бо мақсади безараргардонӣ бо лампаҳои ултрабунафш таъмин мегарданд.
Ёдовар мешавем, ки Бонки Рушди Германия- KfW дар якҷоягӣ бо Вазорати тандурустӣ ва ҳифзи иҷтимоии аҳолӣ барномаҳои ҳамкории молиявии Германия бо Тоҷикистонро аз соли 2003 дар самти назорати бемории сил, саломатии модару кӯдак ва ёрии таъҷилии тиббӣ, табобат ва пешгирии полиомиелит амалӣ мекунад.








Дар Душанбе оид ба риояи дурусти қоидаҳои бехатарӣ ҳангоми заминларза корҳои фаҳмондадиҳӣ гузаронида шуданд
Ба муносибати Рӯзи Конститутсияи Ҷумҳурии Тоҷикистон конференсияи илмӣ-амалӣ доир гардид
Дар Маркази касбомӯзӣ ва хизматрасонии ноҳияи Восеъ аз рӯи 5 ихтисос мутахассисон омода карда мешаванд
24 ОКТЯБР — РӮЗИ ИТТИФОҚҲОИ КАСАБА. Нақши он дар ҳимояти ҳуқуқ ва манфиатҳои иҷтимоию иқтисодии кормандон назаррас аст
Дар ноҳияи Шоҳмансур вобаста ба пешгирии ҳолатҳои фавқулода корҳои фаҳмондадиҳӣ гузаронида шуданд
Дар маркази ноҳияи Данғара бунёди 315 бинои истиқоматии аз 9 то 16 ошёна ба нақша гирифта шудааст
Бахшида ба Рӯзи иттифоқҳои касабаи Тоҷикистон ҳамоиши фарҳангӣ доир карда шуд
Дар қаламрави Тоҷикистон заминларза ба амал омад
Дар шаҳри Омск Форуми 5-уми сарварони ҷавони Русия ва давлатҳои Осиёи Марказӣ оғоз ёфт
Масъалаи ба такмили ихтисос фаро гирифтани табибони тоҷик дар Эрон баррасӣ гардид
Дар Душанбе масъалаи густариши ҳамкории судӣ байни Тоҷикистон ва Арабистони Саудӣ баррасӣ гардид
Барои пешгирии заҳролудшавӣ аз дуди ангишт қоидаҳои муҳими истифодаи онро бояд риоя намуд






