Таҳқиқи навор: Мард бо истифода аз маъюбии фарзандаш ба ҷамъоварии маблағ машғул гардидааст

Июль 11, 2020 12:43

ДУШАНБЕ, 11.07.2020 /АМИТ «Ховар»/. 7 июли соли ҷорӣ дар як қатор шабакаҳои иҷтимоии интернетӣ наворе пайдо гардид, ки тибқи иттилои муаллиф, ҳар саҳар марди тануманди тахминан 49-50-солае  як ҷавони маъюбро дар аробачаи махус шинонида, дар назди бозорчаи маҳаллаи 33-юми шаҳри Душанбе  оварда мемонад ва ин навраси маъюб то бегоҳ ба талбандагӣ машғул мешавад. Сипас бо фаро расидани шом мард боз ба ҳамин мавзеъ омада, маблағҳои дар давоми рӯз ҷамъгардидаро ба ҷайби худ андохта, сипас боз навраси маъюбро бо худ мебарад.

Тавре хабарнигори АМИТ «Ховар» бо истинод ба маркази матбуоти ВКД ҶТ иттилоъ медиҳад, баъди ба Интернет роҳ ёфтани навори мазкур кирдорҳои ғайриқонунии марди аз ҳисоби писарбачаи маъюб маблағ ҷамъкунанда мавриди вокуниши шадиди шаҳрвандон, махсусан истифодабарандагони шабакаҳои иҷтимоӣ қарор гирифт.  Корбарони шабакаҳои иҷтимоӣ аз Раёсати ВКД дар шаҳри Душанбе  хоҳиш  намуданд, ки нисбати кирдорҳои авомфиребонаи марди дар навор инъикосгардида, ки аз ҳисоби писарбачаи маъюб зиндагиашро пеш мебарад, чораҳои қонунӣ андешида шаванд.

Ҷиҳати муайян намудани шахсияти марди дар навор тасвирёфта  кормандони мақомоти милитсияи пойтахт чораҳои дахлдорро роҳандозӣ намуда, дар натиҷа ӯро муайян ва ба мақомоти милитсия дастрас намуданд. Маълум гардид, ки  ӯ шаҳрванд Ҳабибуллоев Хуршед Асрорович, соли таваллудаш 22.01.1971, истиқоматкунандаи ноҳияи  Рӯдакӣ, деҳаи Арбобхотун буда, ҷавони дар аробачаи маъюбӣ нишаста фарзандаш мебошад.

Зимни санҷиш ҳамчунин муайян карда шуд, ки ин ҷавон  писарбачаи 17-сола буда, дар ҳолати маъюбӣ қарор дорад.

Бо назардошти ҳолатҳои мазкур, нисбати шаҳрванд Ҳабибуллоев Хуршед, ки бо истифода аз муҳтоҷиву дардмандии фарзанди худ ба ҷамъоварии маблағ машғул будааст, парвандаи маъмурӣ тартиб дода шуда, бо қарори суд нисбаташ ҷарима ба андозаи 7 нишондиҳанда барои ҳисобҳо таъин карда,   барои дар оянда такроран содир накардани кирдори мазкур огоҳонида шуд.

 

АКСҲО аз сомонаи ВКД ҶТ

Июль 11, 2020 12:43

Хабарҳои дигари ин бахш

МАСЛИҲАТИ МУТАХАССИС. Оё фарзанди шумо барои ба мактаб рафтан омода аст?
Тоҷикистон ва Амрико ҳамкориро дар соҳаи тандурустӣ тақвият медиҳанд
Дар Душанбе доир ба Истиқлоли давлатӣ ҳамчун рукни асосии идеологияи миллӣ ҳамоиши ҳизбиён баргузор шуд
Дар Балҷувон дар мавзуи «Сулҳу субот – омили рушди устувори соҳаи сайёҳӣ» вохӯрии судманд доир гардид
Ҳамкории Тоҷикистон бо Барномаи рушди СММ дар самти ҳифзи ҳуқуқи инсон муҳокима карда шуд
Муовини Сарвазири Тоҷикистон бо сохтмони маҳаллаи навбунёд дар деҳаи Зарангаки ноҳияи Рашт шинос шуд
Нақши занон дар мақомоти олии қонунгузории Тоҷикистон дар даврони соҳибистиқлолӣ назаррас аст
Бахшида ба Рӯзи кормандони тандурустии Тоҷикистон ҷаласаи тантанавӣ баргузор гардид
ИМРӮЗ — РӮЗИ КОРМАНДОНИ СОҲАИ ТИБ. Дар Тоҷикистон 5254 муассисаи тиббӣ фаъолият менамояд
Дар ноҳияи Кӯшониён Маркази саломатӣ ифтитоҳ гардид
Дар Душанбе Форуми дуюми байналмилалӣ оид ба масъалаҳои маъюбӣ доир гардид
Дар ноҳияи Айнӣ оид ба пешгирии истифодаи ғайриқонунии неруи барқ вохӯрӣ баргузор шуд