Дар Хоруғ бахшида ба 700-солагии Камоли Хуҷандӣ Конференсияи назариявию амалӣ баргузор гардид

Октябрь 23, 2020 10:17

ХОРУҒ, 23.10.2020 /АМИТ «Ховар»/. Дар мақомоти иҷроияи ҳокимияти давлатии шаҳри Хоруғ  бахшида ба 700-солагии шоири шуҳратёри тоҷик Камоли Хуҷандӣ Конференсияи назариявию амалӣ ва ҳамзамон озмун доир ба ҳаёт ва эҷодиёти ин шоири тавонои тоҷик байни омӯзгорони муассисаҳои таълимии шаҳр баргузор гардид.

Мудири шуъбаи маорифи шаҳри Хоруғ Атобек Шукурбеков изҳор дошт, ки “ҳадафи баргузор намудани конференсия ва озмуни мазкур-  ин боло бардоштани ҳисси ифтихори миллӣ ва худшиносиву худогоҳии омӯзгорон аст. Зеро агар омӯзгор ҷӯянда набошаду аз таърихи тамаддунофари халқи худ ва зиндагиномаи намояндагони маъруфи он огоҳии комил надошта бошад, наметавонад насли наврасро дар рӯҳияи хештаншиносӣ ба воя расонад”.

Омӯзгори муассисаи таҳсилоти миёнаи умумии рақами сеюми шаҳри Хоруғ Гуландом Дарвозиева гуфт, ки «Камоли Хуҷандӣ яке аз намояндагони намоёни адабиёти тоҷик буда, дар ғазалсароӣ ҳамрадифи Ҳофизу Саъдӣ шумурда мешавад. Мояи ифтихори халқи тоҷик аст, ки бо пешниҳоди Ҳукумати мамлакат ин санаи таърихиро созмони байналмилалии ЮНЕСКО низ пазируфт ва онро дар баробари халқи тоҷик акнун миллатҳои гуногуни  бисёр  кишварҳои ҷаҳон таҷлил мекунанд».

 

Пас аз Конференсияи назаривию амалӣ  байни омӯзгорон  аз рӯи 6 шарт озмун сурат гирифт. Таҳияи рӯзномаи деворӣ, мақола доир ба эҷодиёти Камоли Хуҷандӣ, қироати ғазал бо оҳанг ва шарҳи ғазал аз зумраи шартҳои асосии ин озмун буданд. Ҳайати ҳакамон аз ҳама бештар ба нутқи иштирокчиёни озмун ва  шарҳу тавзеҳи  ғазалиёти Камоли Хуҷандӣ таваҷҷуҳ зоҳир намуданд.

Баъди баҳсу баррасӣ ҳайати ҳакамон дар шарти сароидани ғазал бо оҳанг ҷои аввалро ба омӯзгорони Мактаб-литсеи Оғохон дода, аз рӯи шарти дуюми озмун- «Рӯзномаи деворӣ» мақоми аввал насиби омӯзгори муассисаи таълимии рақами 12 гардид. Беҳтарин мақола доир ба эҷодиёти Камоли Хуҷандиро  омӯзгори Мактаби президентӣ соҳиб шуд.

Ғолибони озмун бо ифтихорномаву туҳфаҳои хотиравии шуъбаи маорифи шаҳри Хоруғ сарфароз гардиданд.

Октябрь 23, 2020 10:17

Хабарҳои дигари ин бахш

«ДАСТХАТҲОИ ҚАЛЪАИ МУҒ». Нодиртарин ёдгориҳои Тоҷикистон ба рӯйхати «Ҳофизаи ҷаҳонӣ»-и созмони ЮНЕСКО дохил гардиданд
Дар Тоҷикистон ҳунари балети Узбекистон муаррифӣ карда мешавад
Дар Ҷумҳурии Мардумии Чин Рӯзҳои фарҳанги Ҷумҳурии Тоҷикистон идома дорад
Дар шаҳри Панҷакент Боғи фарҳангию фароғатии ба номи Абулқосим Фирдавсӣ бунёд карда мешавад
«УМРЕ БО МУСИҚӢ». Дар Душанбе ҳамоиши илмӣ баргузор гардид
Ба гиромидошти асосгузори мактаби классикии шеър-мусиқии замони Сомониён Абулаббоси Бахтиёр симпозиуми байналмилалӣ доир шуд
Дар Ҳисор маҳфил-озмуни «Шоҳнома Ватан аст!» оғоз гардид
Директори Хадамоти федералии приставҳои судии Федератсияи Русия бо таъриху тамаддуни тоҷикон шинос шуд
Дар Китобхонаи миллӣ даври аввали озмуни «Фурӯғи субҳи доноӣ китоб аст» баргузор гардид
Дастхатҳои Қалъаи Кӯҳи Муғ ба рӯйхати «Ҳофизаи ҷаҳонӣ»-и ЮНЕСКО дохил шуданд
СОЛИ ФАРҲАНГИ КИТОБХОНӢ. Дар доираи он дар вилояти Хатлон конференсияи илмӣ-амалӣ баргузор шуд
Байни Академияи миллии илмҳои Тоҷикистон, Бойгонии апостолии Ватикан ва Китобхонаи апостолии Ватикан Ёддошти тафоҳум ба имзо расид