Дар ноҳияи Ҷалолуддини Балхӣ пул бо дарозии 20 метр сохта мешавад

ДУШАНБЕ, 27.10.2020 /АМИТ «Ховар»/. Дар деҳаи Ҳосилоти шаҳраки Гулистони ноҳияи Ҷалолуддини Балхии вилояти Хатлон  пул бо дарозии 20 метр ва бари 8,4 метр сохта мешавад.

Тавре роҳбари сохтмон Абдусалом Аминов ба АМИТ «Ховар» иброз дошт, пули мазкур бо дастгирии Мақомоти иҷроияи ҳокимияти давлатии ноҳияи Ҷалолиддини Балхӣ аз ҷониби ширкати туркии «GARANTIALSAT GAYRIMANKUL YATIRIM A.S»  бунёд мегардад.

Мавсуф зикр кард, ки «сохтмони пул то аввали соли 2021 ба итмом мерасад. Дар айни замон кор тибқи ҷадвал идома дорад. Ҳар рӯз сокинони даҳ маҳаллаи ҷамоати деҳа омада, дар сохтмони иншоот саҳм мегузоранд. Ҳамаи кумаккунандагон бо хӯроки гарм таъмин карда мешаванд».

Бояд гуфт, ки пули кӯҳна солҳои дароз дар ҳолати харобӣ қарор дошт. Сохтмони пули нав ба сокинон имкон медиҳад, ки бидуни мушкил ба дигар минтақаҳо  сафар  кунанд.