Сарвазири мамлакат дар Душанбе бо ҷараёни тадбирҳои омодагии иншооти соҳаи барқу гармидиҳӣ ба мавсими сармо шинос шуд

Октябрь 23, 2020 16:00

ДУШАНБЕ, 23.10.2020 /АМИТ «Ховар»/. Имрӯз Сарвазири мамлакат Қоҳир Расулзода дар шаҳри Душанбе бо рафти тадбирҳои омодагии  иншооти соҳаи барқу гармидиҳӣ ба мавсими сармо шинос шуд. Сарвазири мамлакат нахуст бо фаъолияти Маркази барқу гармидиҳии Душанбе-2  шинос шуд.

Ба хотири бе мушкилӣ сипарӣ намудани давраи тирамоҳу зимистони солҳои 2020-2021 дар Маркази барқу гармидиҳии «Душанбе-2» 1 миллиону 300 ҳазор тонна ангишт захира карда мешавад. Ҳамарўза аз конҳои захиравӣ кашонидани ангишт идома дошта, то имрўз дар анборҳои Маркази барқу гармидиҳии «Душанбе-2» беш аз 922 ҳазор тонна ангишт захира гардидааст.

Мавриди зикр аст, ки неруи барқ ва гармӣ, ки дар давраи тирамоҳу зимистон дар Маркази барқу гармидиҳии Душанбе -2 истеҳсол мешавад, боиси сарфа гардидани неруи барқи аз неругоҳҳои барқи обии мамлакат истеҳсолшаванда мегардад. Иқтидори Маркази барқу гармидиҳии Душанбе -2 истеҳсоли 400 мегаватт неруи барқ ва 235 Гкаллория гармӣ мебошад.

Маркази барқу гармидиҳии Душанбе -2 бо дастгоҳу таҷҳизоти муосири соҳавӣ муҷаҳҳаз буда, имрўзҳо дар иншооти мазкур мутахассисони варзидаи ватанӣ дар якҷоягӣ бо шарикони рушд барои таъмини сокинони пойхтахти мамлакат бо неруи барқ ва гармӣ шабонарўзӣ фаъолият доранд.

Сипас дар Маркази барқу гармидиҳии Душанбе -2 таҳти раёсати Сарвазири мамлакат ҷаласа баргузор гардид.

Дар кори ҷаласа масъалаи тақвият бахшидани ҷараёни кашонидани ангишт ва захираи он, ҷоннок намудани фаъолияти иншооти барқу гармидиҳӣ, пайваст намудани иншооти таъйиноти гуногун бо шабакаҳои гармидиҳӣ ва дигар масъалаҳо мавриди таҳлилу баррасӣ қарор дода шуда, ҷиҳати ҳалли мушкилоти мавҷуда фикру мулоҳизаҳои судманд пешниҳод гардид. Барои бе мушкилот сипарӣ намудани давраи тирамоҳу зимистони солҳои 2020-2021 аз  масъулони Вазорати саноат ва технологияҳои нав, Вазорати энергетика ва захираҳои об, Ширкати «Барқи тоҷик» ва дигар сохторҳо ҷоннок намудани фаъолият тақозо карда шуд.

Дар идома Сарвазири мамлакат аз ду нуқтаи пайвасткунандаи иншооти таъйиноти гуногун бо гармӣ дидан намуд.

Таъкид гардид,  ки дар давраи тирамоҳу зимистони солҳои 2020-2021 дар шаҳри Душанбе шумораи иншооте, ки бо гармӣ таъмин карда мешаванд, 2511 ададро ташкил медиҳад, ки аз ин 1269 иншоот дар ноҳияи Сино, 500 иншоот дар ноҳияи Исмоили Сомонӣ, 500 иншоот дар ноҳияи Шоҳмансур ва 242 иншоот дар ноҳияи Фирдавсӣ ба қайд гирифта шудаанд, ки нисбат ба ҳамин давраи соли гузашта 331 иншоот зиёд мебошад. Дар маҷмӯъ то имрўз 98 дарсади иншооти ба қайд гирифташуда барои қабули гармӣ омода карда шудаанд.

Ҳамчунин имрўзҳо бо ташаббуси Мақомоти иҷроияи ҳокимияти давлатии шаҳри Душанбе барои ба Шабакаҳои гармидиҳӣ пайваст намудани қариб 300 иншооти дигар корҳо идома доранд.

Сарвазири мамлакат Қоҳир Расулзода аснои шиносоӣ масъулони соҳаро вазифадор намуд, ки фаъолияти дастаҷамъонаро тақвият бахшида,  дар доираи дастуру супоришҳои Ҳукумати Ҷумҳурии Тоҷикистон ба хотири ҳарчи зудтар таъмин намудани сокинони пойтахти мамлакат- шаҳри Душанбе бо гармӣ аз имконоти мавҷуда мақсаднок истифода баранд.

Октябрь 23, 2020 16:00

Хабарҳои дигари ин бахш

Ҳиссаи хоҷагиҳои ҷамъиятӣ дар ҳаҷми умумии маҳсулоти кишоварзӣ бештар гардидааст
Дар ноҳияи Муъминобод кишти зироати кишоварзӣ идома дорад
НАҚЛИЁТИ БАРҚӢ. Тоҷикистон ба мавҷи аккумуляторҳои истифодашудаи онҳо чӣ гуна омодагӣ мебинад?
Муовини якуми Сарвазири Ҷумҳурии Тоҷикистон бо Президенти Гурӯҳи Бонки ҷаҳонӣ мулоқот намуд
Тоҷикистон дар самти моликияти зеҳнӣ дар даврони соҳибистиқлолӣ ба 39 созишномаю конвенсияҳои байналмилалӣ ҳамроҳ шуд
Бахшида ба Рӯзи байналмилалии моликияти зеҳнӣ як зумра ихтироъкорони Тоҷикистон қадрдонӣ карда шуданд
Дар Тоҷикистон шумораи субъектҳои хоҷагидорӣ 5,1 фоиз зиёд гардидааст
Ҳайати Тоҷикистон дар Малайзия бо дастовардҳо дар самти татбиқи Ҳадафҳои Рушди Устувор шинос гардид
Байни Тоҷикистон ва Русия дар соҳаи энергетика Протоколи муҳим ба имзо расид
Дар Душанбе доир ба масъалаи равишҳои инноватсионӣ дар соҳаи тиб ҳамоиш доир шуд
Эмомалӣ Раҳмон: «Масъалаи талафоти неруи барқ ва истифодаи ғайриқонунии он дар ҷумҳурӣ ташвишовар аст»
Сарвазири Тоҷикистон Қоҳир Расулзода бо Раиси Ҳукумати Федератсияи Русия Михаил Мишустин мулоқот намуд