Дар Хуҷанд ҷаласаи Комиссияи муштараки Тоҷикистон ва Ӯзбекистон оид ба ҳамлу нақли байналмилалии автомобилӣ баргузор гардид

 ДУШАНБЕ, 28.11.2020 /АМИТ «Ховар»/. 26-27 ноябр дар шаҳри Хуҷанд ҷаласаи навбатии Комиссияи муштараки Тоҷикистон ва Ӯзбекистон оид ба ҳамлу нақли байналмилалии автомобилӣ баргузор гардид. Дар ин бора аз Вазорати нақлиёти Ҷумҳурии Тоҷикистон ба АМИТ «Ховар» хабар доданд.

Дар вохӯрӣ аз ҷониби Тоҷикистон муовини Вазири нақлиёти Ҷумҳурии Тоҷикистон Шоиста Саидмуродзода ва дигар кормандони масъули Вазорат  ва аз ҷониби Ӯзбекистон муовини Вазири нақлиёти Ӯзбекистон Даврон Деҳқонов ва дигар масъулин ширкат варзиданд.

Зимни ҷаласа  масоили  ҳамкории дуҷониба оид ба ҳамлу нақли байналмилалии автомобилӣ, кушодани хатсайрҳои иловагии байналмилалӣ дар самти мусофирбарӣ ва транзит,  ворид намудани тағйирот ба Созишномаи амалкунанда бо мақсади содагардонии раванди  ҳамлу нақл бо нақлиёти автомобилӣ, мубодилаи  рухсатномаҳо барои анҷом додани ҳамлу нақли байналмилалии автомобилӣ дар соли 2021, мубодилаи таҷриба оид ба ҷорӣ намудани  рақамикунонӣ дар нақлиёт ва дигар масъалаҳо мавриди баррасӣ қарор гирифтанд.

Сипас оид ба масоили муҳокимашаванда Протокол ба имзо расид, ки онро аз ҷониби Тоҷикистон муовини Вазири нақлиёти ҷумҳурӣ Шоиста Саидмуродзода ва аз тарафи Ӯзбекистон муовини вазири нақлиёт Даврон Деҳқонов ба имзо расониданд.