Ҷоми Ҳизби Халқии Демократии Тоҷикистон насиби дастаи дастгоҳи КИМ ҲХДТ гардид

Декабрь 21, 2020 10:45

ДУШАНБЕ, 21.12.2020. /АМИТ «Ховар»/.  Бо ибтикори Кумитаи Иҷроияи Марказии Ҳизби Халқии Демократии Тоҷикистон  бо мақсади дар сатҳи баланд таҷлил намудани 26-солагии таъсиси ҲХДТ байни кормандони дастгоҳи КИМ ҲХДТ ва сохторҳои он дар шаҳри Душанбе  ва шаҳру ноҳияҳои тобеи марказ барои дарёфти  Ҷоми Ҳизби Халқии Демократии Тоҷикистон мусобиқаи футболи хурд гузаронида шуд.

Тавре аз КИМ ҲХДТ ба АМИТ “Ховар” хабар доданд, мусобиқа дар сатҳи баланди ташкилӣ баргузор гардида, дар фарҷом дастаи дастгоҳи КИМ ҲХДТ бо дастаи КИ ҲХДТ дар шаҳри Турсунзода дар бозии финалӣ барои ба даст овардани Ҷоми Ҳизби Халқии Демократии Тоҷикистон сабқат анҷом доданд. Дар натиҷа, бозӣ бо ҳисоби 1 бар 0 ба нафъи дастаи дастгоҳи КИМ ҲХДТ анҷом пазируфт.

Бояд гуфт, ки мусобиқаи мазкур тӯли як ҳафта идома ёфта, 18 декабр ба анҷом расид. Ҷойи якум насиби дастаи дастгоҳи КИМ ҲХДТ шуда, ҷойи дуюмро дастаи КИ ҲХДТ дар шаҳри Турсунзода ва ҷойи сеюмро дастаи КИ ҲХДТ дар ноҳияи Шоҳмансури шаҳри Душанбе  ба даст оварданд.

Дар мусобиқа Зоҳир Ҳабибзода  “Беҳтарин сардори даста”, Тоҷиддин Тағоев — “Сардовари беҳтарин”, Фаррух Аловиддинов – “Мураббии беҳтарин”, Ибодулло Тоҳиров– “Нишонзани беҳтарин”, Шавкат Латипов– “Нимҳимоятгари беҳтарин”, Фирдавс Мирзоев– “Дарвозабони беҳтарин” ва Абдулфайз Шамсов   “Бозингари беҳтарин” дониста шуданд.

Дар ҷамъбасти мусобиқаи футболи хурд муовини якуми Раиси ҲХДТ Абдуҷаббор Азизӣ, муовини Раиси ҲХДТ Асрор Латифзода, ноиби Президенти Федератсияи футболи Тоҷикистон Алишер Урунов, чемпиони Бозиҳои олимпии Рио-де-Жанейро дар соли 2016 Дилшод Назаров, директори телевизиони “Варзиш” Парвиз Нориён ва дигар шахсиятҳои маъруф иштирок намуданд.

Абдуҷаббор Азизӣ ҳамаи варзишгарон ва ҳозиринро ба муносибати 26-солагии таъсиси ҲХДТ табрик гуфта, зикр намуд, ки мусобиқаи футболи хурд барои дарёфти Ҷоми Ҳизби Халқии Демократии Тоҷикистон бо мақсади амалӣ намудани Барномаи ҲХДТ дар самти тарбияи ҷисмонӣ ва варзиш, оммавигардонии варзиш, таблиғи тарзи ҳаёти солим ва дарёфти варзишгарони ин намуди варзиш гузаронида шуд.

Дар бозиҳои доиршуда футболбозони дастаи дастгоҳи КИМ ҲХДТ, аз ҷумла, ҳамлагари даста Ибодуллои Тоҳир, нимҳимоятгар Шаҳобиддини Ёқубзод, дарвозабон Зоҳир Ҳабибзода ва ҳимоятгар Изатуллои Ҳабибзод худро ҳамчун футболбози беҳтарин муаррифӣ намуда, тавонистанд ғолибияти дастаи дастгоҳи КИМ Ҳизби Халқии Демократии Тоҷикистонро таъмин намоянд.

Дар ҷамъбасти мусобиқаи футболи хурд ба ғолибон Ҷом, медал, диплом, тӯб ва мукофоти пулии Кумитаи тадорукот тақдим карда шуд.

 София ШОИК,
АМИТ “Ховар”

Декабрь 21, 2020 10:45

Хабарҳои дигари ин бахш

Дастаи «Истиқлол» барандаи Ҷоми Федератсияи футболи Тоҷикистон-2025 гардид
ФУТБОЛ. Дастаи мунтахаби занонаи Тоҷикистон тими Арабистони Саудӣ бозии дӯстон мегузаронад
ФУТБОЛ. Гулмуроди Саъдулло бозии марҳилаи интихобии Ҷоми ҷаҳон-2026 байни дастаҳои Индонезия ва Баҳрайнро доварӣ менамояд
«ҶОМИ РУШД-2025». Дастаи мунтахаби наврасони Тоҷикистон (U-17) бар дастаи Эрон зафар ёфт
ҶОИЗАИ ПРЕЗИДЕНТИ ҶУМҲУРИИ ТОҶИКИСТОН. Беш аз 1,7 миллион сомонӣ ба ғолибони мусобиқаҳои байналмилалӣ супорида шуд
«ҶОМИ РУШД-2025». Бозии якуми дастаи мунтахаби наврасони Тоҷикистон (U-17) баргузор шуд
«Baku Grand Slam 2025». Ҷудочиёни тоҷик дар ин мусобиқа соҳиби ду медали биринҷӣ шуданд
«НАРДБОЗӢ». Он варзиши фикрие аст, ки ниёгонамон эҳё намудаанд
ҶОИЗАИ ПРЕЗИДЕНТИ ҶУМҲУРИИ ТОҶИКИСТОН. Дар Душанбе маросими ҷоизасупории соҳаи тарбияи ҷисмонӣ дар соли 2024 баргузор мегардад
Ҳамкории дуҷониба дар соҳаи варзиш байни Тоҷикистон ва Эрон муҳокима шуд
Байни Тоҷикистон ва Қатар ҳамкорӣ дар соҳаи кор бо ҷавонон ва варзиш тақвият меёбад
ФУТБОЛ. Қуръакашии тақвими Чемпионати Тоҷикистон-2025 баргузор гардид