Сироҷиддин Муҳриддин дар ҷаласаи Шӯрои вазирони корҳои хориҷии СААД иштирок намуд

ДУШАНБЕ, 01.12.2020 /АМИТ «Ховар»/. 1 декабр Вазири корҳои хориҷии Ҷумҳурии Тоҷикистон Сироҷиддин Муҳриддин дар ҷаласаи навбатии Шӯрои вазирони корҳои хориҷии Созмони Аҳдномаи амнияти дастаҷамъӣ (СААД), ки дар сиғаи маҷозӣ доир гардид, ширкат намуд. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар ҷараёни ҷаласа роҳбарони ҳайатҳо атрофи мавзӯъҳои муҳими амнияти байналмилалӣ ва минтақавӣ, инчунин фаъолияти СААД табодули афкор карданд.

Дар суханронии худ С. Муҳриддин дидгоҳи Тоҷикистонро нисбат ба масъалаҳои рӯзмарраи ҳамкорӣ дар самтҳои авлавиятноки рӯзномаи ҷории Созмон ироа намуд.

Ӯ тазаккур дод, ки пайомадҳои тӯлонии иқтисодиву иҷтимоии ҳамагирии коронавирус ҳамчунин метавонанд ба амният хатарзо бошанд.

Дар суханронӣ таваҷҷуҳи хос ба масъалаҳои муқовимат ба терроризм, ифротгароӣ ва ҷинояти фаромиллӣ дар паҳнои СААД зоҳир гардид. Ба ин муносибат масоили Афғонистон ва вазъ дар сарҳади Тоҷикистон бо он кишвар зикр карда шуд.

Зимни ҷаласа С. Муҳриддин авлавияти раёсати дарпешистодаи Тоҷикистон дар СААД дар самтҳои сиёсӣ ва байналмилалиро мухтасар муаррифӣ намуд.

 АКСҲО аз ВКХ ҶТ