Вазири нақлиёт аз саривақт тоза нагардидани роҳҳои мошингард аз барф изҳори нигаронӣ намуд
![](https://khovar.tj/wp-content/uploads/2020/07/Azim-Ibrohim.jpg)
ДУШАНБЕ, 31.12.2020/АМИТ «Ховар»/. Барои саривақт тоза накардани роҳ ва истифода набурдани маводи зиддилағжиш дар роҳи мошингарди Душанбе – Қалъаихум — Хоруғ, дар минтақаи Ваҳдат – Норак, ки боиси банд гардидани ҳаркати нақлиёт шуд, сардори идораи хоҷагии роҳҳои автомобилгарди минтақаи Ҳисор Самад Салим аз вазифа озод гардида, ба сардори Муассисаи давлатии нигоҳдории роҳои автомобилгарди ноҳияи Ваҳдат Карим Расулов ва сардори шуъбаи банақшагирии Раёсати сохтмон ва хоҷагии роҳҳо Эгамбердӣ Хӯҷаев танбеҳ дода шуд. Дар ин бора аз Вазорати нақлиёти Ҷумҳурии Тоҷикистон ба АМИТ «Ховар» хабар доданд.
Вазири нақлиёти ҷумҳурӣ Азим Иброҳим дар ҷаласаи назоратии вазорат изҳори нигаронӣ кард, ки новобаста аз он, ки тамоми корхонаву муассиаҳои вазорат тибқи нақшаи тасдиқшуда бо маводи зиддилағжишу техникаи роҳнигоҳдорӣ таъминанд, вале аз хунукназарии мутасаддиён ҳолатҳои сари вақт тоза нагардидани роҳ аз барф ба мушоҳида мерасад, ки ин боиси банд шудани ҳаракати воситаҳои нақлиёт дар баъзе минтақаҳо мегардад.
Вазир изҳор дошт, ки сардиҳои зимистон нав оғоз шуданд ва тибқи пешгӯии мутахассисони обуҳавошиносӣ дар пеш боришоту сардӣ пешбинӣ гардидааст ва мо бояд ҳар дақиқа омода бошем, то ҳаракати нақлиёт дар роҳҳо таъмин бошад.
Ба масъулини соҳа супориш дода шуд, ки пайваста дар ҳолати омодабош қарор дошта, техникаву механизмҳои роҳнигоҳдорӣ бояд пайваста омодаи кор бошанд.
«Барои ба саҳлангорӣ роҳ додан ва бо айби муассисае агар ҳаракати нақлиёт дақиқае банд гардад, мутасаддиён ба ҷавобгарӣ кашида мешаванд, — таъкид намуд вазир.
Вазири нақлиёт ҳамчунин аз он изҳори норозигӣ кард, ки новобаста аз он ки шахсан бо роҳбарони корхонаву ҷамъиятҳои нақлиётӣ вохӯрӣ намуда, барои ба зимистонгузаронӣ омодагӣ дидан дастурҳо дода буд, вале ҳанӯз ҳам на ҳамаи ҷамъиятҳо ба ин масъала ҷиддӣ муносибат мекунанд. Ҳанӯз ҳам ронандаҳо бе омодагӣ ба зимистон, яъне бо чархҳои тобистона (капронӣ), бе занҷиру бел ва ҳатто бе омода будани мошинашон ба зимистон ба сафар мебароянд. Воситаи нақлиёташон дар роҳ ё вайрон мешавад ё ба ағабаҳо баромада натавониста, ҳаракати нақлиётро банд мекунанд. Баъзан дар ин масъала нозирони роҳ ҳам хунукназарӣ менамоянд.
Дар ин росто, Вазир ба масъулини соҳа супориш дод, ки кормандони Хадамоти давлатии назорат ва танзим дар соҳаи нақлиёт дар ҳамкорӣ бо нозирони БДА бояд дар ин маврид чораҷӯӣ намуда, мошинҳои ба зимистон омода набударо қаблан огоҳ намоянд.
Бояд зикр кард, ки ҷиҳати иҷрои бандҳои дахлдори қарори Ҳукумати Ҷумҳурии Тоҷикистон аз 31 марти соли 2020, «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2020-2021» Вазорати нақлиёт нақшаи чорабиниҳоро оид ба сари вақт омода намудани соҳаи нақлиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2020-2021 тасдиқ намуда, Ситоди фаврии доимоамалкунанда таъсис дода шуд.
Дар муассисаҳои давлатии нигоҳдории роҳҳои автомобилгарди шаҳру ноҳияҳо бо назардошти бақияи мавсими гузашта маводи зиддилағжиш, сӯзишвории дизелӣ ва ҳезум харид ва захира гардид. Барои фаъолияти мунтазам ва дар ҳолати хуб нигоҳ доштани роҳҳо дар ин давра дар муассисаҳои давлатии нигоҳдории роҳҳои автомобилгард 548 техника омода шудаанд. Аз ҳисоби техникаҳои ин муассисаҳо 11 гурӯҳи зудамал ташкил ва дар мавсими тирамоҳу зимистон ҳангоми ҳолатҳои фавқулода сафарбар мегарданд. Новобаста аз ин, аз ҷониби вазорат барои таъмини ҳаракати мунтазами воситаҳои нақлиёти автомобилӣ дар роҳҳо ва ағбаҳо аз ҳисоби роҳбарият ва кормандони масъули соҳа гуруҳҳои корӣ таъсис дода шудаанд. Ба муассисаҳои давлатии нигоҳдории роҳҳои автомобилгард аз ҳисоби маблағҳои мутамарказонидашудаи вазорат либосҳои махсус ва пойафзолҳои корӣ ҷудо карда шудааст.
Акси аввал аз бойгонӣ