Барномаи махсуси президенти ФФТ оид ба рушди футболи деҳот дар Ҷумҳурии Тоҷикистон барои солҳои 2021-2024 тасдиқ шуд

Февраль 26, 2021 16:10

ДУШАНБЕ, 26.02.2021 /АМИТ «Ховар»/. Аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Федератсияи футболи Тоҷикистон «Барномаи махсуси президенти Федератсияи футболи Тоҷикистон дар бораи рушди футбол дар деҳоти Ҷумҳурии Тоҷикистон барои солҳои 2021-2024», инчунин нақшаи амалисозӣ ва ҳайати кумитаи тадорукотии амалисозии Барнома тасдиқ шуд. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

«Барномаи махсуси президенти Федератсияи футболи Тоҷикистон оид ба рушди футбол дар деҳоти Ҷумҳурии Тоҷикистон барои солҳои 2021-2024» аз ҷониби департаменти техникии Федератсияи футболи Тоҷикистон дар ҳамкорӣ бо раёсати варзиши Кумитаи кор бо ҷавонон ва варзиши назди Ҳукумати Ҷумҳурии Тоҷикистон бар асоси Қонуни Ҷумҳурии Тоҷикистон «Дар бораи тарбияи ҷисмонӣ ва варзиш» ва «Барномаи рушди футбол дар Ҷумҳурии Тоҷикистон барои солҳои 2017-2021» таҳия гардида, дурнамои рушди футболро дар деҳоти кишвар барои чор соли оянда муайян менамояд.

Ҳадафҳои асосӣ аз роҳандозии Барнома тақвият бахшидан ба пешрафти бозии футбол дар деҳот, баргузор намудани мусобиқаҳои мухталиф байни дастаҳои футболи деҳот, бозсозӣ ва беҳтар гардонидани сифати майдонҳои футболбозӣ дар деҳот, ҷалби шумораи бештари аҳолӣ ба бозии футбол ва тавассути бозии футбол дар рӯҳияи ватанпарварӣ тарбият намудани наврасону ҷавонон дар деҳоти кишвар мебошад.

Дар доираи амалигардонии чорабиниҳои Барнома ҳамасола мусобиқаи варзишӣ байни дастаҳои футболи деҳаҳо ва маҳаллаҳои аҳолинишини ҷамоатҳои шаҳрак ва деҳоти шаҳру ноҳияҳои ҷумҳурӣ дар чор марҳила гузаронида мешаванд.

Дар мусобиқа шахсони аз 18 то 35-сола иштирок менамоянд. Харҷҳо вобаста ба баргузории марҳилаи якум, дуюм ва сеюми мусобиқа: ҳаққи хизмати доварон, ловозимоти варзишӣ, ҷом, медалҳо, дипломҳо, туҳфаҳои хотиравӣ барои ҷойҳои 1, 2 ва 3-юм аз ҳисоби мақомоти иҷроияи маҳаллии ҳокимияти давлатӣ, сохторҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Федератсияи футболи Тоҷикистон ва сарпарастон пардохт мешаванд.

Харҷҳои вобаста ба баргузории марҳилаи ниҳоии мусобиқа аз ҳисоби Кумитаи кор бо ҷавонон ва варзиши назди Ҳукумати Ҷумҳурии Тоҷикистон пардохт мешаванд. Федератсияи футболи Тоҷикистон дастаҳои иштирокчии мусобиқаро марҳила ба марҳила бо тӯбҳои футболбозӣ ва дигар лавозимоти варзишӣ футбол таъмин менамоянд.

Тибқи Нақшаи амалисозии Барнома соли 2023 таъсис додани Лигаи футболи деҳот дар назар дошта шудааст, ки таъсиси он ба пешрафти футбол дар деҳоти Ҷумҳурии Тоҷикистон вусъати нав мебахшад.

 

АКСҲО аз ФФТ

Февраль 26, 2021 16:10

Хабарҳои дигари ин бахш

Бахшида ба Рӯзи варзишгарон дар Панҷакент майдончаи муосири варзишӣ ба истифода дода шуд
Дар Ниммарафони байналмилалии экологии кӯҳии «Seven Lakes» варзишгарони 10 давлати ҷаҳон иштирок намуданд
Ноибони Президенти ФФТ бо ҳолати омодагии варзишгоҳҳои шаҳри Ҳисор ба мусобиқаҳои байналмилалӣ шинос шуданд
Соли 2025 варзишгарони Тоҷикистон дар мусобиқаҳои байналмилалӣ 238 медал ба даст оварданд
НИШАСТИ МАТБУОТӢ. Донишҷӯёни Донишкадаи тарбияи ҷисмонӣ дар мусобиқаҳои байналмилалӣ соҳиби 26 медал шуданд
Таеквондочиёни тоҷик дар Чемпионати Осиё дар Малайзия ду медали биринҷӣ ба даст оварданд
Паҳлавонони тоҷик «Ulaanbaatar Grand Slam-2025»-ро бо як медали нуқра ҷамбаст намуданд
Марҳилаи якуми даврҳои омӯзишӣ оид ба барномаи литсензияи «B» идома дорад
Имрӯз мусобиқаи байналмилалии «Ulaanbaatar Grand Slam-2025» оид ба гӯштини ҷудо оғоз меёбад
Дар Чемпионати ҷаҳон оид ба варзиши намудҳои обӣ 2 варзишгари Тоҷикистон иштирок менамоянд
Бозии интихобии Ҷоми Осиё-2027 байни Тоҷикистон ва Малдив дар Хуҷанд баргузор мешавад
Тоҷикистон бозиҳои марҳилаи интихобии Ҷоми Осиё-2026 байни духтарони то 17-соларо мизбонӣ менамояд