Дар ғарби Тоҷикистон минтақаи саноатӣ бунёд мегардад

ДУШАНБЕ, 13.02.2021 /АМИТ «Ховар»/. Дар шаҳри Турсунзода дар масоҳати 21 гектар минтақаи саноатӣ бунёд мегардад. Дар ин хусус  12 феврал раиси шаҳри Турсунзода Парвиз Акрамзода ба намояндагони расонаҳои хабарӣ иттилоъ дод.

Мавсуф зикр кард, ки  минтақаи саноатӣ дар доираи татбиқи яке аз чор ҳадафи стратегии Ҳукумати  Ҷумҳурии Тоҷикистон –саноатикунонии мамлакат дар ҳамкорӣ бо Вазорати саноат ва технологияҳои нави ҷумҳурӣ дар шафати  Ҷамъияти саҳомии кушодаи «Ширкати алюминии тоҷик» сохта шуда, дар он беш аз даҳ корхонаи саноатӣ, ки ба истеҳсоли маҳсулоти гуногуни саноатӣ машғул хоҳанд шуд, ба истифода дода мешаванд.

Бунёди минтақаи саноатӣ дар шаҳри Турсунзода дар ҳолест, ки Раиси шаҳри Турсунзода аз афзоиши ҳаҷми  истеҳсоли  маҳсулоти саноатӣ дар шаҳр дар соли 2020 хабар дода, гуфт, ки соли гузашта дар шаҳри Турсунзода беш аз 870 миллион сомонӣ  маҳсулоти саноатӣ истеҳсол гардидааст. Ин нишондиҳанда нисбат ба ҳамин давраи соли 2019 қариб 64 ҳазор сомонӣ зиёд аст.