Дар вилояти Хатлон омодагӣ ба даъвати баҳории наваскарон оғоз ёфт

БОХТАР, 18.02.2021 /АМИТ «Ховар»/. Дар вилояти Хатлон омодагиҳо ҷиҳати дар сатҳи баланд гузаронидани даъвати баҳорӣ ба сафи Қувваҳои мусаллаҳи кишвар оғоз ёфтанд», — иттилоъ дод ба мухбири АМИТ «Ховар» раиси кумитаи Ҷамъияти мададгори мудофиаи вилояти Хатлон Абдуллохон Достиев.

Имсол тибқи нақша 1180 нафар ҷавонони вилоят бояд ба  курсҳои махсус фаро гирифта шаванд ва аз ҷумла, 243 нафари онҳо аллакай дар курсҳои ронандагӣ таҳсил мекунанд. Омӯзиш мутобиқи категорияҳои «B» ва «C» сурат мегирад.

Ба гуфтаи ӯ, омӯзиши касбии ҷавонон ба онҳо имкон медиҳад, ки соҳиби касбе шаванд, ки на танҳо ҳангоми хидмати ҳарбӣ, балки пас аз он низ лозим бошад.

Давоми даъвати тирамоҳии соли 2020 дар вилоят 1030 нафар дар курсҳои омӯзишӣ таҳсил ва ба сафи артиш даъват шуданд, ки 304 нафари онҳо дар курсҳои ронандагӣ таҳсил карда буданд.