Неруҳои десантӣ 42 нафарро аз банди «Толибон» дар Бағлон наҷот доданд

ДУШАНБЕ, 17.02.2021 /АМИТ «Ховар»/. Вазорати мудофиаи Афғонистон бо пахши як изҳорот эълом доштааст, ки неруҳои махсуси десантӣ шаби гузашта (16 феврал) амалиётеро барои ишғол намудани зиндони «Толибон» дар деҳаи Алӣ Хоҷаи вилояти Бағлон оғоз карданд, хабар медиҳад АМИТ «Ховар» бо истинод ба шабакаи иттилоотии “Ariana News”.

Дар изҳорот қайд шудааст, ки дар натиҷаи амалиёт 42 нафар, аз ҷумла 25 низомӣ ва 17 ғайринизомӣ, аз зиндони «Толибон» озод карда шуданд.

Вазорати мудофиа афзудааст, ки ин афрод аз даҳ рӯз то ду сол дар асорати «Толибон» буданд ва мавриди шиканҷа низ қарор гирифтаанд.

«Танҳо дар 30 рӯзи охир неруҳои амниятӣ ва дифоии кишвар тақрибан 100 нафар бегуноҳро аз дасти «Толибон» наҷот доданд», — омадааст дар изҳороти  вазорати мудофиаи ҶИА.

Гурӯҳи «Толибон» дар ин бора ҳанӯз изҳори назар накардааст.