Корҳои созандагӣ дар истироҳатгоҳи «Зумрад» бо маром идома доранд

Февраль 27, 2021 10:33

ДУШАНБЕ, 27.02.2021 /АМИТ «Ховар»/. Осоишгоҳи «Зумрад»  пурра навсозӣ гардида истода, тибқи нақша дар муҳлати кӯтоҳтарин ба яке аз маконҳои сатҳи баланди истироҳатӣ ва табобатӣ табдил меёбад. Дар доираи сафари корӣ ба шаҳри Исфара Раиси Федератсияи иттифоқҳои касабаи мустақили Тоҷикистон барои шиносоӣ бо фаъолият ва корҳои созандагӣ аз Осоишгоҳи мазкур  дидан намуд. Дар ин бора аз Федератсияи иттифоқҳои касабаи мустақили Тоҷикистон ба АМИТ «Ховар» хабар доданд.

Дар осоишгоҳ сохтмони якчанд иншоот бо суръат идома дорад. Дар даромадгоҳи осоишгоҳ бинои ташхисиву машваратии чорошёна бунёд шуда истодааст. Дар назар аст, ки дар ошёнаи якум ташхисгоҳи клиникиву биокимиёвӣ, иммуноферментӣ, ташхис бо нури ренгенӣ, томографияи компютерӣ, ташхиси фаросавтӣ ҷойгир карда шаванд. Ошёнаи дуввум барои табибони машваратӣ, ошёнаҳои сеюм ва чорум барои хобгоҳ пешбинӣ гардидаанд. Дар баробари ин дар  дохили осоишгоҳ бинои 9-ошёна бо таҳхона қомат афрохта, дар он ташкили табобатҳои барқшифоӣ, гармшифоӣ, маҳси дастӣ, барқӣ ва маҳс бо дастгоҳҳои махсус, ҳуҷраи сӯзандармонӣ, гиёҳшифоӣ дар назар аст. Аз ошёнаи дуюм то нуҳуми ин бино ҳуҷраҳои истиқоматии намудҳои стандарт, люкс, аппартамент барои тақрибан 640 кати хоб ба нақша гирифта шудааст. Дар осоишгоҳ қаҳвахона, ошхонаи хӯрокҳои миллӣ ва маркази дилхушӣ бо тарабхона бунёд ёфтааст.

Ҳамчунин дар дохили осоишгоҳ сохтмони ҳавзи шиноварӣ бо суръат идома дорад. Ҳавзи шиноварӣ доимамалкунанда буда, дар бинои он ташкили ҳуҷраҳои табибони пӯст, косметолог, маҳси дастӣ, пардозӣ, кошонаи ҳусн ва дигар нуқтаҳои хизматрасонӣ ба нақша гирифта шудааст. Сохтмони амфитеатр ва қароргоҳ барои қабули меҳмонони фахрӣ низ идома дорад.

Чанде пеш сохтмони бинои табобатии замонавӣ иборат аз ду ошёна оғоз гардид. Дар нақша аст, ки табобатҳои обшифоӣ, маъданшифоӣ, мумшифоӣ, лойқашифоӣ, нафтшифоӣ дар ин бино гузаронида шаванд. Инчунин лоиҳаи сохтмони «аквапарк» омода гардида, рӯзҳои наздик сохтмони он оғоз хоҳад ёфт.

Ёдовар мешавем, ки Осоишгоҳи «Зумрад» дар масофаи 3 км аз маркази шаҳри Исфара, 110 км аз маркази вилоят- шаҳри Хуҷанд, дар соҳили дарёчаи Исфара, қисми ҷанубу ғарбии водии Фарғона ва дар домани қаторкӯҳҳои Туркистон, дар баландии 940 метр аз сатҳи баҳр ҷойгир шудааст. Иқлими табобатии «Зумрад» дар табобати бисёр бемориҳо мавқеи хосса дорад. Зумрад (шакли дурусти талаффузаш Зумурруд)- ин санги қиматбаҳои xилодор буда, хосияти муолиҷавӣ дорад. Оби маъдандори «Шифо» яке аз неъматҳои босамар истифодашаванда дар осоишгоҳ мебошад. Ташхиси ин оби дармонбахш дар санҷишгоҳҳои «Средазгеоминвод», пажӯҳишгоҳҳои илмию тадқиқотии курортология ва физиотерапияи шаҳрҳои Тошканду Москва сурат гирифта, натиҷаҳои дилхоҳ додааст. Тадқиқот дар ин замина таркиби бойи ин обро ба исбот расонд ва ба ин васила имконият фароҳам омад, ки маъданоб барои табобати бемориҳои дилу рагҳои хунгард, системаи асаб, узвҳои такяву ҳаракат, таносули занона, пӯст ва вайронии мубодилаи моддаҳо ба таври васеъ мавриди истифода қарор гирад. Ҳудуди умумии осоишгоҳ 20 гектар буда, онро буттаҳою дарахтони нодири ороишию мевадиҳанда, гулу гулбуттаҳо ороиш медиҳанд.

Имсол мардуми шарафманди тоҷик ҷашни бузургу таърихӣ- 30-солагии Истиқлоли давлатии Ҷумҳурии Тоҷикистонро таҷлил мекунанд. Ба ин муносибат дар ин макон корҳои ободониву созандагӣ бомаром идома доранд. Умед аст, ки осоишгоҳи «Зумрад» боз ҳам ободтару дилработар гардида, ба маркази дӯстдоштаи табобативу фароғатӣ ва сайёҳӣ мубаддал мешавад.

Февраль 27, 2021 10:33

Хабарҳои дигари ин бахш

Даври дуюми Фестивал-озмуни «Андалеб-2025» дар ноҳияи Рӯдакӣ аз рӯйи 12 номинатсия доир шуд
Дар ноҳияи Ёвон хонандагону омӯзгорон суханронии Сарвари давлатро ба муносибати Рӯзи дониш ва Дарси сулҳ тамошо карданд
Дар муассисаҳои таълимии вилояти Суғд соли нави таҳсил бо тамошои суханронии Пешвои миллат ба муносибати Рӯзи дониш оғоз гардид
Дар Истаравшан татбиқи Лоиҳаи «Фаъолият дар самти таъмини амнияти озуқавории Тоҷикистон» баррасӣ гардид
Имрӯз дар водиҳои Тоҷикистон ҳаво то 40 дараҷа гарм мешавад
34 СОЛИ ПУР АЗ САМАР. Мулоҳизаҳои директори Маркази тадқиқоти стратегӣ доир ба таҳкими Истиқлолияти давлатии Тоҷикистон
Имрӯз дар ноҳияҳои алоҳидаи Тоҷикистон чангу ғубор ба амал меояд
Омодагӣ ба ҷаласаи Комиссияи байниҳукуматӣ оид ба ҳамкории тиҷоратию иқтисодӣ байни Тоҷикистон ва Озарбойҷон баррасӣ гардид
Имрӯз дар шаҳри Душанбе ҳаво то 38 дараҷа гарм мешавад
Дар Конибодом ба хонандагон либосҳои мактабӣ ва ашёи хониш тақдим гардид
Дар Душанбе дар мавзуи «Навсозии Чин» конференсия баргузор гардид
Истиқлоли давлатӣ омили калидии сиёсати муваффақи Тоҷикистон дар арсаи байналмилалӣ аст