Вера Кулакова-Бранерруд: «Таҳияи Стратегияи миллии мубориза бо терроризм — барои Тоҷикистон вазифаи бениҳоят муҳим ва мубрам аст»

ДУШАНБЕ, 09.02.2021 / АМИТ «Ховар» /. «Таҳияи Стратегияи миллии мубориза бо терроризм — вазифаи — бениҳоят муҳим ва  мубрам аст. Ин саволи густурда ва ҷиддӣ аст» — чунин посух дод имрӯз  дар посух ба суоли    хабарнигори АМИТ «Ховар» ҳамватани мо, собиқ директори генералиии Радиои «Ватан» Вера Кулакова — Бранерруд, ки феълан дар Стокголм зиндагӣ мекунад.

Ба андешаи ӯ, пеш аз ҳама, мебояд, ки таҷрибаи пойтахтҳои пешрафтаи ҷаҳон дар самти татбиқи системаи Smart City омӯхта шавад. «Масалан, Лондон аллакай аз рӯи шумораи камераҳо дар як километри мураббаъ пешсаф аст ва то соли 2025 ба нақша гирифта шудааст, ки шумораи умумии камераҳо, ки амниятро дар метрополис назорат мекунанд, аз 1 миллион зиёдтар карда шавад. Татбиқ ва истифодаи системаҳои навтарин дар асоси таҳлили Big Data (Маълумоти бузург), АI (зеҳни сунъӣ), технологияҳои ҷамъоварии таъҷилӣ, коркард ва таҳлили маълумот ба таври назаррас сатҳи бехатариро баланд мебардорад», — чунин меҳисобад Вера Кулакова-Браннеруд.

Вай инчунин таҷрибаи таъмини амният ва рафъи таҳдидҳои террористиро  ҳангоми гузаронидани мусобиқоти Ҷоми ҷаҳонӣ оид ба футбол дар Россия,  ки беназир эътироф шуд, мисол овард. “Пас аз мусобиқоти Ҷоми ҷаҳон — 2018, бисёр кишварҳо ба технологияҳои амниятие, ки дар Россия истифода мешаванд, таваҷҷуҳи бесобиқа зоҳир карданд. Гузаронидани машваратҳо дар заминаи Маркази зиддитеррористии кишварҳои узви ИДМ, ки Ҷумҳурии Тоҷикистон дар он шомил мебошад, бамаврид аст», — шарҳ медиҳад вай.

Тавре ки  Вера Кулакова-Бранерруд гуфтааст, бояд дар доираи стратегияи оянда ба кори пешгирии ҷалби наврасон ва ҷавонон ба ҳаракатҳои экстремистӣ ва террористӣ диққати махсус дода шавад. Муҳим ин аст, ки нуқтаҳои ҳамфикрӣ пайдо шаванд, сари вақт ба ниёзмандиҳои  қисми фаъолтарин ва ба осонӣ талқиншавандаи аҳолӣ посух дода шавад.

“Ҷавонон, новобаста аз вазъи молиявии худ, бояд имкониятҳои бештар барои рушди шахсӣ, мансабӣ ва касбӣ дошта бошанд. Марказҳои муосири фарҳангию маърифатӣ ва Бунёдҳои дастгирии ҷавонон метавонанд вазъро ба таври назаррас беҳтар намуда, ҷавононро ҳавасманд  созанд ва ҳамин тавр дар кори пешгирӣ ба шомилшавии онон ба ҳаракатҳои номатлуб нақши калидӣ дошта бошанд. Масалан, дар чунин марказҳо кӯдакон метавонанд гуруҳҳои мусиқӣ ва театрии ҷавонон, студияҳои бадеӣ ва техникӣ созанд, тамрин кунанд ва консертҳо баргузор намоянд. Соле чанд маротиба метавонанд дар чорабиниҳои гуногуни давлатӣ ва хусусӣ  ҳунарнамоӣ намоянд, таҷриба ҳосил намоянд ва пул кор кунанд. Ё ин ки, барои мисол, барои насли калонсол дарсҳои маҳорат ташкил намоянд», — шарҳ дод вай.