Дар Донишкадаи давлатии санъати тасвирӣ ва дизайн таҳти унвони «Аз Наврӯз то Наврӯз» намоиши корҳои эҷодӣ баргузор шуд

Март 18, 2021 11:35

ДУШАНБЕ, 18.03.2021 /АМИТ «Ховар»/. Имрӯз дар Донишкадаи давлатии санъати тасвирӣ ва дизайни Тоҷикистон ҷашни байналмилалии Наврӯз бо намоиши корҳои эҷодии омӯзгорону донишҷӯён таҳти унвони «Аз Наврӯз то Наврӯз» баргузор гардид.

Хабарнигори АМИТ «Ховар» Фирӯзаи Давлат гузориш медиҳад, ки дар намоишгоҳи мазкур зиёда аз 80 асари эҷодӣ, аз ҷумла мусаввирӣ, манзаранигорӣ, нақшу нигори миллӣ, кандакорӣ дар чӯб, миниатюра ва наққошии кундал, дастархони идонаи наврӯзӣ ба маърази тамошо гузошта шуданд.

Дар маросими ифтитоҳи намоиш ректори Донишкадаи давлатии санъати тасвирӣ ва дизайни Тоҷикистон Ҷамшед Ғанизода, устодону донишҷӯён ва дигар шахсони масъул ширкат варзиданд.

Ҷамшед Ғанизода иброз дошт, ки “миёни тамоми идҳое, ки дар  саросари  ҷаҳон  ҷашн гирифта мешаванд, шояд куҳансолтаринашон Наврӯзи хуҷастапай бошад. Воқеан, агар ба таърихи ҷашну идҳо назар афканем, мебинем, ки аксари онҳоро одамон бо судури фармоне баровардаву расм кардаанд. Вале Наврўз ҷашни қадимтарин барои мардум аст ва он маҳз аз табиат бардошта шудааст, яъне айёмест, ки шабу рўз баробар мешаванд”.

Ҳамчунин зикр дошт, ки фазилати Наврӯз ҳамчун ҷашни пайванди инсон бо табиат аз вусъати амалҳои поку нек ва созандагиву ободкорӣ иборат аст, ки дар тамоми марҳалаҳои ташаккули он мукаммал гардида, на танҳо аҷдоди мо, балки мардумони мухталифро ба чунин амалҳои воло ҳидоят кардааст. Наврӯз на танҳо хушнудиву шодмонӣ меорад, балки як айёми мусоид ва таконбахши созандагиву ободкорӣ буда, ба пешрафту ободии ҳар хонадон, маҳалли зист, шаҳру ноҳия ва дар маҷмӯъ ба ободии сарзаминамон мусоидат менамояд.

Мақсад аз баргузории ин намоиш- муаррифии корҳои эҷодии рассомони ин даргоҳ буда, ба ин восита ҷалб намудани насли наврас ба санъати рассомию ороишӣ мебошад.

Тавре аз тасвирҳои устодони Донишкада аён буд, онҳо бо дастони ҳунарофари худ ба василаи рангҳо табиати Тоҷикистонро пурҷило ва хеле зебо нишон додаанд.

Ҳамчунин дар ин рӯз ба ифтихори иди байналмилалии Наврӯз барномаи  фарҳангӣ ва намоиши ҳунарҳои миллӣ барпо гардида, бо риояи суннатҳои хоси ин ҷашн дастархони наврӯзӣ ороста шуд.

Ҷамшед Ғанизода иброз намуд, ки Наврӯз чун рамзи сулҳу оромӣ, пиндор, гуфтору кирдори нек моро ба сӯи рӯзгори осуда, сулҳу субот ва кӯшиш барои зиндагии оромона раҳнамоӣ мекунад.

Бояд гуфт, ки Донишкадаи давлатии санъати тасвирӣ ва дизайни Тоҷикистон 30 марти соли 2013 таъсис ёфта, давоми фаъолияти худ кадрҳои баландихтисос омода намудааст. Дар донишкада се факултет — «Санъати тасвирӣ» бо кафедраҳои «Мусаввирӣ ва ҳайкалтарошӣ», «Графика ва санъатшиносӣ», «Дизайн» бо кафедраҳои «Дизайн», «Санъати ороиши амалӣ», «Технологияи иттилоотӣ ва иқтисод», «Тарҳрезии бадеии либос», инчунин  кафедраи «Забонҳо ва фанҳои гуманитарӣ» ва  Маркази бачагонаи рассомӣ, устохонаҳои тахассусӣ дар назди  раёсати донишкада ташкил гардидаанд.

Март 18, 2021 11:35

Хабарҳои дигари ин бахш

Кормандони мақомоти милитсияи шаҳри Душанбе ба тамошои Осорхонаи миллии Тоҷикистон рафтанд
Бахшида ба Рӯзи байналмилалии ҳифзи ёдгориҳои таърихию фарҳангӣ конференсияи илмӣ-назариявӣ доир мешавад
Дар Москва ба муносибати 25-солагии таъсиси Ташкилоти заминавии кор бо забонҳо ва фарҳангҳои кишварҳои ИДМ чорабинӣ баргузор гардид
Дар шаҳри Гулистон Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз ёфт
Дар вилояти Хатлон Фестивали ҷумҳуриявии «Ҳафтаи китоби кӯдакону наврасон» оғоз гардид
Имрӯз дар Тоҷикистон Рӯзи байналмилалии китоб таҷлил мегардад
Дар Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз мегардад
Масъалаи баргузории Рӯзҳои фарҳанги Ҷумҳурии Тоҷикистон дар Ҷумҳурии Қирғизистон баррасӣ шуд
Аъҷубасозӣ як бахши ҳунари кулолӣ ва сохтани бозичаҳо аз гилу сафол мебошад
Дар вилояти Суғд бо иштироки меҳмонон аз Узбекистон ва Қирғизистон ҳамоиши фарҳангӣ баргузор гардид
МУЖДАИ НАВРӮЗӢ. «Ёддоштҳо»-и устод Айнӣ барои ҳамзабонони эронӣ ба нашр расид
Бахшида ба Соли фарҳанги китобхонӣ дар вилояти Хатлон китоби «Наврӯзномаи Хатлон» ба табъ расид