Имрӯз дар Душанбе Мусобиқаи ҷумҳуриявӣ оид ба теннис оғоз мешавад

ДУШАНБЕ, 15.03.2021 /АМИТ «Ховар»/. Бахшида ба Иди Наврӯзи байналмилалӣ имрӯз дар шаҳри Душанбе Мусобиқаи ҷумҳуриявӣ оид ба теннис оғоз мегардад. Мусобиқаи мазкур  байни ҷавонону наврасони синни 10-13 ва 14-17 доир шуда, дар он дастаҳо аз шаҳри Душанбе, вилоятҳои Суғду Хатлон ва шаҳру ноҳияҳои тобеи марказ иштирок мекунанд. 

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» иттилоъ доданд, Мусобиқаи ҷумҳуриявӣ оид ба теннис аз рӯйи намуди тенниси инфиродӣ, тенниси ҷуфтӣ ва тенниси омехта доир мегардад.

Ин мусобиқаи ҷумҳуриявӣ байни ҷавонону наврасон чор рӯз идома ёфта, 19 март ҷамъбаст мегардад.

Мақсад аз баргузории  мусобиқаи мазкур тарғиби тарзу ҳаёти солим, ҷалб намудани наврасон ба тарбияи ҷисмонӣ ва варзиш, тарғибу ташвиқи теннис дар Ҷумҳурии Тоҷикистон, баланд бардоштани маҳорати касбии варзишгарон ва мустаҳкам намудани алоқаи дӯстӣ байни варзишгарони наврас мебошад.

Акс аз бойгонии АМИТ «Ховар»