ОГОҲИИ АГЕНТИИ ОБУҲАВОШИНОСӢ: 28-29 март дар Тоҷикистон боронҳои пуршиддат дар назар аст

ДУШАНБЕ, 26.03.2021 /АМИТ «Ховар»/. 28-29 март дар ҷумҳурӣ боридани боронҳои пуршиддат дар назар дошта шудааст.  Дар ин бора аз Агентии обуҳавошиносии  Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар» хабар доданд.

Дар ин рӯзҳо дар ноҳияҳои водӣ-доманакӯҳӣ борон ва дар ноҳияҳои кӯҳӣ боридани борон ва барф пешгӯӣ мешавад.  Дар баъзе ноҳияҳо раъду барқ ба амал омада, шамол аз самти ғарб бо суръати то 15-20 метр дар як сония мевазад.

29 март пастшавии ҳарорати рӯзонаи ҳаво то 8-10 дараҷа дар назар дошта шудааст. Аз 27 март то 1 апрел дар ноҳияҳои кӯҳии ҷумҳурӣ фаромадани тарма пешгӯӣ шуда, дар водиҳо ва доманакӯҳҳои вилоятҳои Хатлон, Суғд ва ноҳияҳои тобеи марказ фаромадани сел аз эҳтимол дур нест.

27-29 март дар дарёҳои аз нишебиҳои ҷанубии қаторкӯҳҳои Ҳисор ҷоришаванда ва дарёҳои Қизилсӯ, Ёхсӯ ва Обихингоб баландшавии сатҳи об пешгӯӣ мешавад.