То ҷашни 30-солагии Истиқлоли давлатӣ дар шаҳри Кӯлоб 873 иншоот таъмиру барқарор ва бунёд мешаванд

КӮЛОБ, 16.03.2021 /АМИТ «Ховар»/. То ҷашни 30-солагии Истиқлоли  давлатии Ҷумҳурии Тоҷикистон дар шаҳри Кӯлоб таъмиру барқарорсозӣ ва бунёди 873 иншооти  таъйиноти гуногун ба нақша гирифта шудааст.

Имрӯзҳо дар шаҳри Кӯлоб  корҳои ободонию созандагӣ бомаром идома дошта, бо дастгирии Мақомоти иҷроияи ҳокимияти давлатии шаҳри Кӯлоб дар маҳаллаҳои шаҳр биноҳои баландошёнаи истиқоматӣ бунёд гардида истодаанд.

Тавре сармуҳандиси сохтмон Сафаралӣ Мирзоев ба мухбири АМИТ “Ховар” иттилоъ дод, дар иншооти ҷашнӣ корҳои сохтмонӣ бомаром идома  дошта, сохтмончиён бо масолеҳи зарурӣ таъмин мебошанд. Аксари иншооти бунёдшаванда аз ҷониби соҳибкорони ватанӣ сохта шуда, то имрӯз 60 фоизи корҳои нақшавӣ ба анҷом расидаанд.

Баробари ба истифода супоридани иншооти ҷашнӣ ва таъмиру барқарорсозии иншооти маданию маишӣ то ҷашни 30- солагии  Истиқлоли давлатии Ҷумҳурии Тоҷикистон симои шаҳру деҳоти Кӯлоб ба куллӣ тағйир ёфта, даҳҳо ҷойҳои нави корӣ муҳайё мешаванд.

Сокинони шаҳри Кӯлоб мақсад доранд бо анҷом додани корҳои ободонию бунёдкорӣ ҷашни бузурги миллиро дар сатҳи баланд истиқбол намоянд.