Раиси вилояти Хатлон ва Сафири Франсия дар Тоҷикистон роҳандозии ҳамкории доираҳои тиҷоратиро баррасӣ намуданд

Апрель 16, 2021 09:02

ДУШАНБЕ, 16.04.2021 /АМИТ «Ховар»/. 15 апрел Раиси вилояти Хатлон Қурбон Ҳакимзода бо Сафири Франсия дар Ҷумҳурии Тоҷикистон Мишел Тарран ва ҳайати ҳамроҳонаш мулоқот намуд. Дар ин бора аз шуъбаи иттилоотию таҳлилии дастгоҳи раиси вилояти Хатлон хабар доданд.

Дар мулоқот ҷонибҳо доир ба имконияти рушди ҳамкорӣ дар бахши омодасозии омӯзгорони баландихтисоси забони франсавӣ дар муассисаҳои таҳсилоти олӣ, ифтитоҳи маркази фарҳангии забономӯзӣ, бунёди корхонаҳои хурди коркарди меваю сабзавот ва содироти он ба Франсия, ташкили намоишгоҳҳои рассомӣ, фестивалҳо, сафарҳои ҳунарӣ, чорабиниҳои сайёҳӣ, варзишӣ, рӯзҳои фарҳангӣ, роҳандозии ҳамкории доираҳои тиҷоратии минтақаҳои ду кишвар ва дигар самтҳо табодули назар карданд.

Қурбон Ҳакимзода зикр намуд, ки «Мақомоти иҷроияи ҳокимияти давлатии вилоят ба масъалаи рушди соҳаи иқтисодиёт диққати аввалиндараҷа дода, ҷиҳати беҳсозии фазои сармоягузории ватанию хориҷӣ тадбирҳои зарурӣ меандешад. Вилояти Хатлон бо 34 кишвари наздику дур ҳамкории иқтисодию тиҷоратӣ ба роҳ монда, гардиши савдои хориҷии вилоят соли 2020 беш аз 308 миллион доллари амрикоиро ташкил дод.

Соли равон дар ҳудуди вилоят 35 лоиҳаи сармоягузорӣ ба маблағи умумии 478 миллион доллар амалӣ мегарданд».

Ҳамчунин ҷонибҳо ба масъалаи рушди соҳаи саноат таваҷҷуҳ зоҳир намуданд. Зикр гардид, ки шумораи корхонаҳои саноатии вилоят ба беш аз 620 адад расида, танҳо соли гузашта дар вилоят ба маблағи умумии 8,8 миллиард сомонӣ маҳсулоти саноатӣ истеҳсол шудааст.

Соли 2020 ва семоҳаи якуми соли 2021 аз ҷониби соҳибкорони маҳаллӣ 98 корхонаи хурду миёна бунёд ва мавриди баҳрабардорӣ қарор гирифтанд. Инчунин 90 дарсади неруи барқи дар ҷумҳурӣ истеҳсолшуда ба вилояти Хатлон рост меояд.

Дар мулоқот зикр шуд, ки вилояти Хатлон калонтарин минтақаи аграрии Ҷумҳурии Тоҷикистон ба ҳисоб рафта, рушди мамлакат ба ин соҳа вобастагӣ дорад.

Бинобар ин, дар вилоят ба масъалаи ислоҳоти хоҷагии деҳот ва таҷдиди хоҷагиҳои бузург аҳамият дода мешавад. Имрӯз саҳмдорони беш аз 68 ҳазор хоҷагиҳои деҳқонии амалкунанда озодона ба интихоби кишти маҳсулот, парвариш, коркард ва фурӯши он машғуланд.

Бунёди минтақаҳои озоди иқтисодии «Данғара» дар ноҳияи Данғара, «Панҷ» дар ноҳияи Ҷайҳун ва «Кӯлоб» дар шаҳри Кӯлоб барои ташкили корхонаҳои муштарак ва ҳамкорӣ бо доираҳои тиҷоратии кишварҳои хориҷӣ имконияти васеъ фароҳам овардааст.

Раиси вилоят Қурбон Ҳакимзода ва Сафири Франсия дар Тоҷикистон Мишел Тарран изҳори итминон намуданд, ки барои вусъати ҳамкорӣ дар соҳаҳои саноат,  кишоварзӣ, сайёҳӣ миёни минтақаҳои ду кишвар шароит фароҳам мебошад.

Дар вилояти Хатлон 19 ширкати туристӣ фаъолият мекунанд, ки омодаи ҳамкорӣ бо ширкатҳои сайёҳии Франсия буда, метавонанд гардишгарони Франсияро ба саёҳати навъҳои кӯҳнавардӣ, экологӣ, шикорӣ, табобатӣ, солимгардонӣ, таърихӣ-фарҳангӣ ҷалб намоянд.

Сафири Франсия Мишел Тарран аз пазироии самимӣ изҳори миннатдорӣ намуда, зикр кард, ки якчанд маротиба аз мавзеъҳои таърихию фарҳангии вилояти Хатлон дидан кардаву таассуроти нек бардоштааст.

Аксҳо аз шуъбаи иттилоотию таҳлилии дастгоҳи раиси вилояти Хатлон

Апрель 16, 2021 09:02

Хабарҳои дигари ин бахш

ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Бародарон Абдураҳимзодаҳо қариб 2 километр роҳи деҳаи Элоки Файзободро мумфарш карданд
Татбиқи «Барномаи рушди иҷтимоию иқтисодии шаҳри Турсунзода барои солҳои 2020-2025» баррасӣ шуд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. ҶДММ «Панҷрӯд Панҷ» ба парвариши 22 ҳазор сар «Хайсес ҳувайт» машғул аст
Сафири Франсия дар Тоҷикистон аз МОИ «Кӯлоб» боздид намуд
Дар Тоҷикистон истеҳсоли маҳсулоти саноатӣ дар 3 моҳ 17,4% зиёд шуд
Вазорати меҳнати Тоҷикистон: дар маълумоти Вазорати корҳои дохилии Россия шумораи муҳоҷирони тоҷик зиёдтар нишон дода шудааст
Тоҷикистон ва Туркия метавонанд ҳаҷми табодули молро то ба 1 миллиард доллар расонанд
Имсол дар вилояти Суғд дар 178 ҳазор гектар зироати баҳорӣ мекоранд
Дар Душанбе масъалаи ҷалби сармоя ба рушди инфрасохтори сайёҳии Тоҷикистон бо гурӯҳи сармоягузорони Россия баррасӣ гардид
Марҳилаи якуми сохтмони роҳи мошингарди Обигарм-Нуробод оғоз мегардад
Дар Тоҷикистон бори аввал дар 15 соли охир ҳаҷми содирот аз воридот бештар шуд
Вазири нақлиёт бо муовини директори Депортаменти инфрасохтори Агентии ҳамкории байналмилалии Ҳукумати Япония (JICA) мулоқот намуд

Маводҳои таҳлилӣ